Вечерва е пуштен за сообраќај автопатот Скопје-Куманово од наплатната станица во Миладиновци до клучката за Бунарџик, во двете насоки, кој поради пожар попладнето и вечерва неколку часа беше затворен за сообраќај.

Кумановските пожарникари информираат дека се локализирани повеќето од пожарите кои попладнево избувнаа во општините Куманово и Старо Нагоричане, предизвикани од искрење на електрични жици поради силниот ветер.

Пожарникарите интервенирале на шест пожари, од кои пет се изгаснати, информираше заменик-командирот на ТППЕ Куманово, Борис Станковски.

– Пожари имаше во населбата Карпош, кај Табановце, Четирце, Агино село, во атарот меѓу селата Речица и Ваксинце, и една екипа интервенираше во Стрновац. Имаше и пожар на куќа во населба Карпош, изјави Станковски.

Пожарникарите од Старо Нагоричане, пак, интервенирале на два пожара, еден во близина на црквата „Света Петка“ во атарот на Младо Нагоричане и вториот во село Стрновац.

– Една екипа го гасеше пожарот во Стрновац со помош на мештани, беше зафатена стара напуштена куќа, гореа стрништа и нискостеблеста вегетација. Во Младо Нагоричане има опожарен помошен објект и една стара напуштена куќа, сè уште тлее и тука се нашите екипи, изјави командирот на ТППЕ, Далибор Трајковски.