Банките почнуваат да објавуваат дека ќе продолжат со одложувањето на наплатата на ратите за кредитите до 31.3.2021 година, но како што веќе објави Македонската банкарска асоцијација, одложувањето ќе се однесува само за оние на кои тоа им е неопходно.

НЛБ банка соопшти дека понуда за одложување на кредитите ќе има за оние за кои престанал работниот однос, или им е намалена платата за најмалку 10 отсто во време на кризата. Овие критериуми ќе важат како за кредитокорисникот, така и за со него поврзаните лица, на пример, ако сопругот односно сопругата останале без работа, како и за кокредитобарателот. Исто така, одлагање на отплатата на кредити ќе имаат и оние што имаат високи медицински трошоци поради болест предизвикана од ковид-19.

„Клиентите кои според евиденцијата на Банката исполнуваат некој од овие критериуми ќе добијат индивидуална понуда од Банката, која ќе можат да ја прифатат преку веб-страницата на Банката во рок од 10 дена од датумот на доставување на понудата. Клиентите што во овој рок нема да ја прифатат понудата ќе продолжат со редовна отплата на своите обврски. Клиентите на кои Банката нема да им достави индивидуална понуда, а сметаат дека исполнуваат некој од наведените критериуми, ќе можат самостојно да аплицираат и да поднесат барање за одложено плаќање преку веб-страницата на Банката, со приложување на соодветен документ како доказ за исполнување на некој од критериумите“, информираат од НЛБ банка.

Одлагањето на кредити за оние што останале без работа, имаат намалени приходи, или трошоци за лекување, најави и Уни банка.