Вкупно 137 претставки од странки против конкретни извршители лани се доставени до нивната Комора, покажува нивниот Извештај за работењето во 2024 година. Дел од нив се отфрлени, а дел се доставени до конкретниот извршител за да се слушне и неговата страна. За 15 извршители е поведена дисциплинска постапка, еден извршител добил парична казна, додека еден е привремено суспендиран од должноста. На ниту еден извршител лани не му била трајно одземена лиценцата. Инаку, во 2024 година, извршителите наплатиле над 160 милиони евра, а процентот на реализација на извршувањето достигнал 44,15 отсто.

– Лани биле примени вкупно 167.112 барања за извршување, од кои успешно завршени се 73.795 предмети. Дури 50 отсто од случаите се однесуваат на комунални долгови. Со укинувањето на застарувањето од Уставниот суд, бројот на барањата за извршување се зголеми за 10.000, што ја зголеми продуктивноста на извршителите – стои во Извештајот.

Податоците од работењето на извршителите покажуваат најголема ажурност на Основните судови од Охрид, Струга и Дебар, каде што се оствариле дури 55,6 отсто од барањата за извршување. Од друга страна, пак, подрачјето на Основните судови од Кочани, Берово, Виница и Делчево, имале најмал процент на реализација на примени барања за извршување во 2024 година, односно 29,3 отсто.

– Според структурата на доверителите, извршителите во полза на државата наплатиле вкупен износ од над 2 милиони евра. Воедно, во истиот период, назад во стопанството се влезени вкупно над 127 милиони евра. Во полза на физичките лица доверители реализирани се 33,3 милиони евра. Според структура на должници, извршителите во 2024 година наплатиле најмногу парични средства од компании, потоа од физички лица и крајно од Република Македонија – детализира Извештајот. Според Весна Деловска, претседателката на Комората на извршители, извршните трошоци се разумни и опфаќаат разни дополнителни трошоци.

Во средината на 2023 година беа направени измени на Законот за извршување, со кои оној момент кога износот на каматата ќе го достигне главниот долг (кредитот), пресметката застанува, односно сумата за каматата не може да го надмине главниот долг. Со ова ново решение беа опфатени и постапките за извршување што беа во тек. За измените тогаш не гласаа пратениците на ВМРО-ДПМНЕ и на Левица.

Во меѓувреме, Уставниот суд го укина застарувањето како можност за ненаплата на долговите, а токму временската рамка за застарување требаше да ги заштити граѓаните од злоупотреби со „чување“ предмети за кои потоа се пресметуваат енормни камати.

Сега граѓанските активисти најавуваат иницијатива за нови законски измени со кои треба да се таргетираат адвокатите и нотарите како „алки“ во постапката за присилна наплата. Евентуалните нови законски измени би биле надлежност на Министерството за правда.

Бројот на извршители во земјава е стабилен и лани имало 93, односно 4 помалку од 2018 година, кога во земјава имало 97 извршители.