Единствениот услов кој стои пред нас и пред отворањето на преговорите е внесувањето на Бугарите во Уставот. Утре ќе видиме дали имаат 80 пратеници за некои прашања, не е далеку од тоа. Доколку идниот премиер предложи во Собранието да се промени Уставот, Уставот ќе биде променет за внесување на Бугарите. Дали тоа ќе биде со клаузула со која ќе биде прифатлива за Бугарија и за ЕУ ќе видиме. Сегашната преговарачка рамка е јасна, Бугарите да се внесат во Уставот па потоа да почнат преговорите. Дотогаш Македонија нема да напредува во ЕУ интеграцијата и тоа го видовме“ вели деканот на факултетот за безбедност професорот Никола Дујовски во интервју за утринската програма на „Слободен печат“.

Каква ќе биде политиката на идната Влада останува да видиме, вели Дујовски, но додава дека колку повеќе време губиме, толку повеќе губи општеството, толку повеќе заостануваме, затоа што стоиме во место, а сите други одат напред. Според него кога другите одат напред, а вие стоите во место значи вие пропаѓате. Тогаш луѓето бараат алтернатива, констатира Дујовски.

-Младите се иселија и идните генерации ќе се иселуваат. Затоа можеби не се толку важни меѓуетничките односи колку што се важни генерално односите во општеството. Ми се чини дека ние значително пропуштаме добри можности да развиваме општество независно од тоа дали станува збор за Македонци или Албанци или било кои други. Ни не успеваме да ги задржиме Македонците овде- вели Дујовски.

На прашањето дали е можно Албанија да ги започне преговорите пред нас и тоа да има последици по внатрешните односи во државава Дујовски со став:

-Дали ќе влијае на односите ако Албанија биде одвоена, можно е. Доколку Албанија започне преговори за членство може да се случи во коалицијата, без разлика кој тогаш ќе биде на власт во Македонија, албанскиот фактор да има многу повеќе и посериозни барања или притисок да се исполнат условите кои за жал Европа ни ги наметнува- вели професорот.

Тој посочи дека државата треба да биде дел од ЕУ, не заради самата држава, туку пред сè заради граѓаните.

-Доколку јакне економската состојба на граѓаните, доколку се донесат странските вложувања како што се најавени, доколку се отворат многу повеќе работни места, во тој случај ЕУ можеби и поразлично ќе ги перципира нашите односи и интереси. Но да не забораваме, наши соседи ќе продолжат да бидат и Грција и Бугарија и тие секогаш ќе бидат предизвик за нас. Сериозната работа по однос на зачленувањето во ЕУ, доаѓа по отворањето на преговорите, тогаш кога ќе почнеме реално да ги споредуваме функционалноста на законите, кои несомнено се европски и нивната имплантација овде. Не е работата државата да ја внесеме во ЕУ заради државата, туку заради граѓаните“ посочи Дујовски.

Целото интервју погледнете го во продолжение: