Скопје се соочува со „хроничен“ недостиг на паркинг-места, па пронаоѓањето слободно место на кое може да се остави автомобилот по враќање од работа, за граѓаните е еден од најгорливите проблеми со кои се измачуваат во секојдневното живеење. Паркиралишта недостасуваат во сите општини, а за намалувањето на проблемот што го имаат жителите, не помага ни зонското паркирање онаму каде што е воведено, па дури ни резидентните паркинзи не ја задоволуваат потребата на граѓаните.

Проблемот е особено голем во централното градско подрачје, каде што паркиралишта нема ни за „лек“, па дури и онаму каде скапо се плаќа за еден час паркирање. Затоа низ градот сѐ почесто може да се забележат рампи за влез на паркинзите пред зграда, појава која е сѐ поприсутна низ населбите во Карпош.

Карпошани велат дека до нив стигнала информација дека Општината донела ваква одлука, а дека за да се реализира, потребно било да се соберат потписи од мнозинството станари од зграда и да се поднесе барање во локалната самоуправа, во кое ќе се наведе и дека станарите сами ќе ги сносат трошоците за поставување на рампата и дека ќе се грижат во случај на потреба да има непречен влез за противпожарните возила и за итна помош.

Општина Карпош на барање на станарите од одредени згради дава согласност да се постават рампи, сѐ со цел да го заштитат паркинг-просторот што припаѓа на зградата во која тие живеат, а на кој во континуитет се паркираат граѓани што не живеат на таа адреса, па дури и граѓани што живеат на други улици. Ваквите согласности Општина Карпош ги дава сѐ со цел полека, но сигурно, да се создава ред во паркирањето и секаде онаму каде што колективните станбени згради имаат можност да постават рампа на паркингот каде што тие живеат, општината ќе дава согласности – велат од Карпош.

Оттаму не прецизираат дали ова се однесува само за паркиралиштата што се во сопственост на инвеститорот на зградата, односно на станарите или тоа се однесува и на паркиралиштата на земјиште кое е во државна сопственост. Но, како што неофицијално дознаваме од извори во Општината, речиси секогаш согласност се дава за ставање рампа на паркинг што се наоѓа на приватно земјиште, иако има и ретки случаи кога не е така.

Како што повеќепати сме информирале, од минатата година во населбите Карпош 1 и Карпош 2 се воведе зонско паркирање со идеја да се стави крај на хаосот со паркирањето на овој простор, да запрат меѓусоседските кавги околу местата за паркирање, кои некои се обидуваа да ги сочуваат слободни со узурпирање со столпчиња, пластични канти за бои и слично. Годинава во програмата за инвестиции на ЈП „Градски паркинг“ беше наведено дека зонското ќе се прошири и во други делови на оваа општина.

Ваквиот вид регулирано паркирање можеби донекаде го намали, но никако не го реши проблемот на жителите на овие населби каде што има стари згради без подземни паркиралишта, затоа што воведувањето „зонско“ не создаде нови места, а на ниеден простор не е предвидено паркирање само за резиденти, нешто што, на пример, се практикува на просторот преку улицата Рузвелтова, во општина Центар.

Од ЈП „Градски паркинг“ кога го воведуваа зонското, посочија дека не може јавен паркинг да се ограничи само за резиденти, па така во Карпош 1 и Карпош 2 може да се паркира секој што ќе плати 25 денари од час, колку што е тарифата во Д-зоната. За разлика од Карпош, цело Дебар Маало, на пример, односно сите улици на овој простор во општина Центар се наменети само за паркирање на жителите.

Зоните на „Градски паркинг“ го освојуваат Скопје, ќе се шират низ Карпош, Аеродром, Чаир и Гази Баба

Но, јасно е дека ниту зонско паркирање, ниту рампи пред зградите не можат да го решат недостигот на паркинг-места не само во Карпош туку и низ сите општини во градот. За да се намали ваквиот проблем, на многу локации низ Скопје се најавуваа изградби на монтажни и катни гаражи, но во изминатите неколку години вакво нешто не видовме.
Од Општина Карпош велат дека досега не можеле да ги реализираат ветените гаражи во Карпош 1 и Карпош 2, поради тоа што не бил усвоен ДУП 308, кој се однесува на овој дел.

Планот беше прифатен од советниците неодамна и со него се отвора можност за изградба на пет монтажни гаражи. Најголемата ќе биде во близина на Машинскиот факултет, со можност за паркирање на 700 возила на приземје и шест ката. Гаража треба да се гради и во Карпош 2 кај МИДА, со 180 паркинг-места, како и во близина на крстосницата на булеварите Партизански одреди и 8 Септември, која ќе биде на приземје и два ката и на неа ќе можат да се паркираат 600 автомобили.

Во ДУП се зацртани маркички за уште две катни гаражи во Карпош 1 и тоа зад кафулето „Рузвелт“ со катност П+2 за 250 возила и на просторот помеѓу полициската станица и Партизанска, каде што ќе бидат обезбедени 250 паркинг-места на монтажната гаража што ќе има приземје и еден кат.

Од Општината објаснуваат дека веќе се нарачани два елабората, за по една гаража во двете населби.