Три месеци се чекаше шесте автобуси што во рамките на проектот „ЕУ за чист воздух“ му беа донирани на ЈСП „Скопје“ да се вклучат во сообраќај и исто толку време беше потребно да се отстранат грешките во документацијата и да се обезбеди каско осигурување на возилата. Грешката пак, која беше воочена уште првиот ден по примопредавањето на донацијата, јавното претпријатие, колку и да изгледа чудно, успеа да ја исправи дури вчера.

Автобусите пристигнаа со налепници со информации за патниците во внатрешниот дел на автобусите на кои преводот на македонски и на албански јазик беше погрешен. Веднаш тогаш реагираа од Министерството за животна средина и посочија дека грешките се забележани и дека УНОПС ќе изготви нови налепници, кои ќе бидат заменети пред пуштањето во употреба на шесте еколошки автобуси, наменети за подобрувањето на квалитетот на воздухот во градот Скопје.

Сепак, возилата се вклучија во сообраќај со згрешените налепници, што предизвика потсмешливи коментари меѓу граѓаните. На пример, наместо во „случај на итна ситуација скршете го стаклото“, преводот на налепницата беше „во случај на итна кршина чаша“. И покрај тоа што  ЈСП навреме ги добило новите налепници, не успеало на еден од шесте автобуси навреме да ја исправи грешката.

Дека новите налепници се навреме доставени до претпријатието потврда добивме од Министерството за животна средина и просторно планирање.

Оттаму велат дека по пристигнувањето на автобусите било увидено дека од страна на производителот се аплицирани налепници со јазични грешки, по што веднаш се изработени нови со цел да се обезбеди усогласеност со јазичните стандарди на македонски и албански јазик и прецизна комуникација на информациите кон јавноста.

 Дополнителни количини беа доставени до ЈСП во текот на минатата недела и вчерашниот ден од страна на УНОПС. По информациите дека во некои од автобусите сѐ уште се наоѓаат налепници со јазични грешки, направена е дополнителна проверка и, според информации од ЈСП, во меѓувреме сите налепници се заменети – велат од Министерството.

Од ЈСП и овој случај си го премолчеа, а со своето неефикасно постапување уште еднаш дозволија јавноста да им се потсмева. Затоа што навистина е нејасно како е можно да се пропушти еден автобус, кога се работи само за шест во кои требаше да се сменат налепници.

А да добиеја како донација 100 автобуси? Колку време ќе им требаше да ги пуштат во сообраќај без грешки? Тешко е и да се претпостави.

На новите автобуси ќе им се менуваат налепниците, имало правописни грешки