Израелскиот премиер Бенјамин Нетанјаху повика на забрзана евакуација на Палестинците од Газа, бидејќи Израел започнува голема копнена офанзива, велејќи дека тоа ќе помогне брзо да се заврши војната.

„Моментално жителите го напуштаат Газа, а досега речиси 400.000 од нив веќе заминале“, рече Нетанјаху, додавајќи дека на состанокот во командниот бункер на Израелските одбранбени сили во Тел Авив денес, тој „наредил да се најдат начини за олеснување на нивното заминување“.

„Тие сакаат да заминат, сакаат да го напуштат градот затоа што сакаат – тие одговараат пред нас, а не пред Хамас, кој понекогаш дури и пука кон нив за да ги запре“, рече тој.

Тој истакна дека напорите за евакуација на жителите пред големата офанзива „се успешни, но треба да се интензивираат – да се помогне и забрзаат – затоа што е во наш интерес војната да заврши брзо, а не со пораз“.

„За оние кои велат „Ајде, само завршете го“ – завршувањето на војната со пораз би било огромна победа за силите на злото, оската на злото Иран, кој брзо би се опоравил бидејќи сите гледаат кој победува. Ако Хамас преживее таму, ако останат таму, ќе го наречат тоа победа – и секако сакаме да го постигнеме спротивното“, продолжи тој.

Тој се осврна и на доброволното заминување од Газа.

„Таа можност секако постои; не е отстранета од агендата. Но, тоа не е активна кампања што ја водиме. Тоа не е нешто што го охрабруваме“, рече тој, додавајќи дека 60 проценти од Палестинците би заминале.

Како што пишува „Тајмс оф Израел“, тој остро ги осуди изјавите на другите земји кои веруваат дека на Палестинците не треба да им се дозволи да ја напуштат Газа и дека треба да се задржат по секоја цена.

„За разлика од другите воени зони, тие велат дека е погрешно да ги пуштат да си одат. Јас мислам спротивното – погрешно е да ги спречиме да заминат“, рече тој.

ИДФ соопшти дека кога денес ја започнале планираната голема офанзива во градот Газа, околу 370.000 жители веќе избегале – помалку од половина од околу еден милион Палестинци на кои војската им наредила да се евакуираат. Сепак, егзодусот веќе очигледно го оптоварува достапниот сместувачки капацитет и транспорт од северна Газа.