Судија на претходна постапка при Основниот Кривичен суд Скопје, постапувајќи по предлогот за определување мерки за претпазливост против поранешниот директор на РЕК Битола Васко Ковачевски, а во врска со истрагата за предметот на Обвинителството во јавноста познат како „Адитив“, денеска, веднаш по добивање на известување од МВР за неговата достапност, донесе решение со кое го отфрли предлогот за определување мерки за претпазливост, со оглед дека Ковачевски не е достапен за органите на прогонот, соопшти Кривичниот суд.

Како што извести судот на 11 декември годинава, судија на претходна постапка може да постапува и да донесе решение за прифаќање на предлог на јавен обвинител, без да биде сослушан осомничениот, само доколку за него е предложена мерка притвор, но не и кога против него се предложени мерки за претпазливост, како во конкретниот случај со Ковачевски. Тој воопшто не е уапсен и спроведен во судот да се произнесе за предлогот, како што налагаат одредбите од Законот за кривична постапка, велат од Судот.

Решението на Кривичниот суд ќе биде доставено до странките во постапката, се додава во соопштението.