Не ја прифаќам бугарската декларација, а ако во разговорите со Бугарија на маса се македонскиот јазик и идентитет, ние не учествуваме во такви разговори и тоа јасно им го кажав и на европските земји, одговори вчера премиерот Зоран Заев на обвинувањата на ВМРО-ДПМНЕ дека деновиве се водат тајни преговори во Софија, на кои Македонија се согласила барањата од бугарската декларација од 2019 година да бидат дел од преговарачката рамка за членство во ЕУ. Завчера опозицискиот лидер Христијан Мицкоски преку Фејсбук го обвини премиерот дека „подготвува предавство на националните интереси“ и најави протести, а вчера пратеникот Антонио Милошоски дополни дека специјалниот претставник Владо Бучковски во изминатите три дена во Софија разговара дека „Скопје ќе потпише анекс или друг облик на гаранција што ќе значи прифаќање на анахроните позиции што беа изгласани во декларацијата на бугарското собрание“.

Заев: Не ја прифаќам бугарската декларација

– Не ја прифаќам бугарската декларација. Во Софија се разговара за португалскиот предлог, чие решение е поволно за двете страни. Јас се радувам што предлогот е таков, но без преголеми очекувања затоа што Бугарија сега има техничка влада. Не разговараме ниту за анекс ниту за нов договор, го имаме Договорот за добрососедство. Се бараат формулации за преговарачката рамка, која пак ја носи Европскиот совет, не се одлучува во Бугарија за тоа. Сметаме дека португалскиот предлог е добра основа и треба да му дадеме шанса на процесот. За нас е важно тоа што го сфаќа и целата ЕУ, дека македонскиот јазик и идентитет се неприкосновени и за тоа не разговараме. И во Брисел им кажавме дека за тоа ние не разговараме – рече премиерот.

Тој додаде дека надлежните министри имаат дневна комуникација со бугарските колеги и дека очекува средба со техничкиот премиер Стефан Јанев. Премиерот повторно ја повика Бугарија да нè поддржи на европскиот пат и целата Унија да го одржи зборот и да ѝ испорача преговори на нашата земја.

Во врска со прозивките од опозицијата, Заев рече дека нивното однесување е неодговорно.

– Со статуси на Фејсбук и коментари низ јавноста, не ѝ носат добро на државата. Грижата за иднината е заедничка. Тие го имаат португалскиот предлог и драго ми е што не го коментираат детаљно. Во тој прелог нема нешто што би го загрозило нашиот интерес, туку само да ја гарантира нашата иднина – рече Заев.

Брисел е третата страна на проблемот

Според аналитичарите, иако фокусот е на разговорите помеѓу Скопје и Софија, многу работи зависат од Брисел. Политикологот Иво Рангеловиќ вели дека ЕУ треба да ги заштити интегративните процеси генерално, но и процесите на Македонија.

– Брисел е третата страна на проблемот со тоа што нема цврста и јасна преговарачка рамка, имуна на небулозни барања од земјите-членки. Се разбира дека постојат шанси да се дојде до компромис со техничката влада во Бугарија, но тоа во никој случај нема да биде решение туку рамка или патоказ преку кој ќе се решава спорот, а ќе се крене ветото. Во зависност од новата политичка констелација по изборите во Бугарија може да се очекува решение, но се плашам дека времето само го продлабочува проблемот, односно не треба да чекаме на нова влада. Ако Бугарија го потврди ветото, тоа нема да ја разниша Владата во Македонија бидејќи супстратот на овој проблем е апсурден, но од друга страна, ќе зајакне евроскептицизмот, а со тоа и вакуумот на овие простори – вели Рангеловиќ за „Слободен печат“.

Министерот за надворешни работи Бујар Османи вели дека европските принципи се на наша страна во спорот.

– Се обидуваме тие принципи да ги аргументираме и пред Бугарија и пред нашите пријатели. Правдата е само еден од принципите, но ги има многу. При сите бранови на ширење на ЕУ, имало обиди за наметнување билатерални прашања, за кочење на процесот, но секогаш Унијата излегла посилна и секогаш успеала. Тоа го направила врз основа на почитување на принципите – рече Османи за ТВ 24.

Грција сака решение меѓу Софија и Скопје

Грчкиот заменик-министер за надворешни работи Константинос Власис во интервју за бугарскиот дневен весник „Труд“ вели дека Грција силно ја поддржува европската перспектива на Западен Балкан, позиција што ја потврдија премиерите за време на нивниот состанок минатата година.

Власис посочува дека меѓу соседни земји и особено во регион како што е Балканот, каде што историјата поминала долг пат, неминовно има разногласија и разлики. Според него, единствен начин да се надминат разногласијата секогаш се дискусијата и дијалогот.

Власис е категоричен дека Атина би сакала да види да бидат надминати сите разлики меѓу Софија и Скопје.

– Единствена цел е да се постигне сигурност и стабилност во поширокиот регион и да создаваме заедничка европска иднина за нашите граѓани – вели тој.