Александар Трајановски од денеска повеќе не е заменик градоначалник на Град Скопје. Тој предмалку на седница на Советот поднесе неотповиклива оставка, посочувајќи дека, иако оваа функција ја прифатил со желба да придонесе во работата и развојот на Градот, не може да се помири со тоа дека сега, како што рече,  со градот раководи „екипа“ од Сарај и ДУИ. Според него очигледно е дека единствено раководството на општина Сарај ја има формулата за добра соработка со градоначалничката Данела Арсовска, затоа што тој, како ни другите во државата, не успеал да се справи „со ова чудо од карактер и начин да дејствување“

Поради неконзистентноста на јавните политики, неконзистентноста на јавните претпријатија, поради неконзистентноста во назначувањето и менувањето на директорите на јавните претпријатија и институции, поради целосно напуштање на програмата за модерно Скопје, поради безидејноста во справување со проблемите во Градот и општините, поради незрелата политичка пресметка со сите градоначалници на општините освен со Сарај, заради секојдневното малтретирање на граѓани, инвеститори, стопанственици домашни и странски, луѓе кои го полнат буџетот на градот и општините, како и поради постојаниот мобинг, изживување и репресирање на вработените во Градот и јавните претпријатија, си поднесувам неотповиклива оставка од заменик – градоначалник на Град Скопје.

Во своето обраќање пред советниците Трајановски посочи дека кога се нафатил да биде заменик – градоначалник тогаш градоначалничката наводно била во битка со партизираните претпријатија. Тој потсети дека директорка на „Комунална хигиена“ во тој период беше Косана Мазнева, која тогап влезе во „битка“  со група вработени кои ги тероризирале останатите вработени во претпријатието и ги користеле ресурсите и капацитетите на претпријатието како нивна своина.

За првпат директор на јавно претпријатие се соочи со вакви структури. Косана Мазнева со таа банда херојски се избори и ја отстрани од „Комунална хигиена“. Мазнева беше наградена со отказ, а денеска градоначалничката од Град Скопје токму од таа екипа назначува директори. Од кал да, е од Сарај да е, директор е биде. Во изминатата година Град Скопје со сите расположливи капацитети работи исклучиво во Сарај како да не постојат останатите општини во Скопје. Јас не прифаќам да бидам заменик градоначалник само на Сарај и не прифаќам градот на удоволува само на желбите на Сарај – рече Трајановски.

Како што посочи, оставката не ја поднел досега затоа што досега се обидувал да посредува, да најде компромис и да го ублажи гневот што градоначалничката го предизвикува кај илјадниците граѓани кои побарале помош во Град Скопје, кај стопанствениците, бизнисмените, вработените. Но, како што нагласи, не успеал во тоа.