Независниот академски синдикат (НАкС) минатата недела остварија средба со Синдикатот за образование, наука и култура (СОНК) и Министерството за образование и наука (МОН) на која се дискутирало за потпишување на нов гранков колективен договор и покачување на платите во високото образование и наука.

Да потсетиме дека минатата година НАкС ја поздрави одлуката за покачување на минималната плата, но предупреди дека оваа одлука без усогласување со постојните колективни договори води кон воедначување на трудот на вработените кои извршуваат позиции со различен степен на сложеност и образование. НАкС предупредува дека проблемот станува уште поизразен со новото зголемување на минималната плата во март 2023 година, како и со високата инфлација и зголемувањето на цените на основните производи за живот, велат од Синдикатот.

Го поздравија потпишувањето на Колективниот договор на Унивезитетот „Св. Кирил и Методиј“ во Скопје, но апелираат дека потребни се системски решенија за вработените во јавните високообразовни и научни установи и за таа цел поддржуваат потпишување на нов гранков Колективен договор.

НАкС е подготвен во соработка со СОНК и МОН да даде конструктивен придонес во преговорите за надградување на веќе стекнатите права, обезбедување подобра социоекономска состојба во овие кризни времиња и услови за поглема работна успешност на вработените во високото образование и науката преку Колективен договор за високо образование и наука, кој предвидува примена на коефициенти за соодветно вреднување на трудот по обем и сложеност поврзани со минималната плата, додаваат од Синдикатот.