Највисока стапка на Балканот: Секој трет Албанец настојува да емигрира од земјата
Речоси секој трет жител на Албанија, односно 31 отсто од лицата опфатени со анкета, планира да ја емигрира, што е највисока стапка во регионот.
Препорачано
Резултати од истражувања спроведени во периодот од мај до јуни годинава меѓу 6.000 луѓе во шест земји од Западен Балкан покажаа дека во Албанија, која досега доживеа најсилна емиграција во регионот, сѐ уште е најголема желбата за емиграција, особено меѓу образованите млади луѓе, се наведува во анализата на Регионалниот совет за соработка (РСС) по анкетата на безбедносниот барометар за 2023 година, јави МИА.
– Битно е дека 18 отсто од нив веќе имаат планови и нашле начини да избегаат. Резултатите покажуваат дека емиграцијата во Албанија е поагресивна отколку во другите земји, бидејќи поголем процент од Албанците не сакаат да емигрираат привремено, туку трајно. Од албанските граѓани што се подготвени да заминат, речиси 44 отсто сакаат трајно да емигрираат, што е највисоко ниво во регионот. Оние што имаат намера да заминат генерално се во активната работна сила од 18 до 44 години, додека оние кои не сакаат да заминат доминираат во групата од 45 до 65 и повеќе години – се додава во анализата.
Се оценува дека оваа ситуација условува поголем недостиг на работна сила, кој веќе се смета за „итен случај за Албанија“.
– Во Албанија, движечките фактори кои ја поттикнуваат емиграцијата се поврзани со економски причини и недоверба во институциите. Во исто време, се засилува проширувањето на семејните мрежи и бројот на оние кои можат да ги користат овие врски, што дополнително ја стимулира миграцијата. Од друга страна, миграциската тенденција на добро образованите испитаници неизбежно ги зајакнува проблемите со одливот на мозоци кои се веќе присутни во регионалните економии. Нивното отстранување води кон слаби перформанси во сите области и ерозија на одговорноста во земјата – се констатира во анализата.
Според деновиве објавените податоци на албанскиот Институт за статистика за периодот од 2011-2019 година вкупно 250.000 албански граѓани ја напуштиле државата, односно речиси по 100 албански граѓани секој ден заминувале од земјата.
