Во населеното место Мралино во општина Илинден во употреба  се пуштени две детски игралишта. Едното игралиште се наоѓа на улица 7, додека пак другото е во дворот на основното училиште „Ристо Крле“. На просторот на двете детски игралишта се поставени  лулашки, клацкалки, лизгалки и фигури со коњче, како и клупи и канти за отпадоци, како неопходен и неизоставен дел за уредување и одржување на просторот.

Од Општината информираат дека ПООУ „Ристо Крле“, може да се пофали и со новиот хортикултурно уреден парк и партерно уреден двор со бекатон плочки на површина од 722 м2, нов паркинг простор и патеки околу училишната зграда.

Градоначалникот на Општина Илинден, Александар Георгиевски вели дека овие детски игралишта се од особена важност за релаксација и рекреација на најмалите жители на општината. Градоначалникот додаде дека во овие спортско-рекреативни катчиња, најважните членови на општеството ќе уживаат во игра и забава исполнети со спортски дух.

Од Општина Илинден најавуваат дека во наредниот период ќе бидат изградени нови и реконструирани постојните игралишта и во останатите населени места.