Во судир на автобус и комбе на северот на Малезија, во близина на границата со Тајланд, загинаа најмалку 15 лица, главно студенти, соопштија денеска властите.

Автобусот превезувал студенти од Универзитетот Султан Идрис до нивниот кампус северно од Куала Лумпур. Тринаесет лица загинаа веднаш, двајца починаа во болница, додека 33 се повредени, од кои седум се во критична состојба, соопшти државната канцеларија за управување со катастрофи во Перак.

Повеќето од жртвите се на возраст меѓу 21 и 23 години.

Полицијата соопшти дека се претпоставува дека возачот на автобусот изгубил контрола и одзади удрил во комбето, кое слетало во ендек и автобусот се превртел. Полицијата покрена истрага за да утврди дали до инцидентот дошло поради човечко невнимание или технички проблем.

Очевидци за локалните медиуми изјавија дека сцените се трагични и дека студентите плачат и викаат за помош. Малезискиот премиер Анвар Ибрахим му нареди на Министерството за високо образование да им помогне на семејствата на жртвите.

„Катастрофите како овие, кои често се повторуваат, треба да послужат како поука за сите да бидат внимателни и да не брзаат кон својата дестинација. Нашите животи се скапоцени и не можат да се заменат“, напиша тој на Фејсбук.

Малезија има висока стапка на сообраќајни несреќи. Весникот „Стар“ во март објави дека на патиштата во таа земја во просек на секои два часа умира по едно лице.