Според најновата анкета на јавното мислење во Велика Британија, лидерот на Реформската партија, Најџел Фараж, е на дофат на „Даунинг стрит“ број 10.

Истражувањето го спроведе непрофитната и невладина организација „Мор ин Комон“ (Повеќе заедничко) на репрезентативен примерок од десет илјади граѓани.

Студијата ги опфати сите изборни единици во Велика Британија, т.е. Англија, Шкотска и Велс, и е најсеопфатната анкета на јавното мислење досега од општите избори во 2024 година.

Најпопуларната партија во Велика Британија во моментов е Реформската партија со дваесет и осум проценти од гласовите.

Лабуристичката партија е следна со дваесет и два проценти, а Конзервативците со помал процент на поддршка. Доколку изборите во Велика Британија се одржат денес, Реформската партија би освоила двесте и деведесет места наместо петте што ги имаат во моментов. Ова би им оставило само шеснаесет места помалку од парламентарното мнозинство.

Ова сепак би им овозможило да владеат или со малцинска влада, или во коалиција со, најверојатно, Конзервативната партија или една од унионистичките партии во Северна Ирска.

Според најновото истражување, Лабуристичката партија би изгубила двесте и осумдесет и пет пратеници и би преминала во опозиција со сто дваесет и шест места. Британците немаат помала недоверба кон конзервативците, кои би изгубиле уште четириесет пратеници, а за прв пат од нивното основање, би паднале на двоцифрен број пратенички места – осумдесет и еден.

Покрај реформистите, во пораст се и либералните демократи, кои, иако се поддржани од петнаесет проценти од електоратот, не би можеле да ја преведат таа популарност во повеќе од едно ново пратеничко место. Ова би ги довело до седумдесет и три пратеници, што е донекаде успех, но и неуспех да се искористи моментот на целосно губење на довербата на гласачите во двете традиционално доминантни партии – Лабуристите и Конзервативците.

Враќањето на шкотските националисти

Благодарение на разочарувањето на електоратот од премиерот Стармер, Шкотската национална партија воскреснува од мртвите и би освоила триесет и три места во Вестминстер на општите избори.

Лидерот на Шкотската национална партија, Џон Свини, е политички ветеран, но по корупциските скандали во кои е вклучена поранешната шкотска прва министерка Никола Стерџен и нејзиниот сопруг, како и катастрофалното водство на Јусуф Хамза, неуспесите на Лабуристичката партија во секое политичко поле доаѓаат како подарок за него, што би можело да го врати изгубеното членство.

Доколку изборите за шкотскиот парламент се одржат денес во Холируд, националистите би освоиле четириесет и две од педесет и деветте места, враќајќи се на нивната завидна позиција од 2019 година.

Друга добра вест за реформистите е дека тие ја зголемиле својата маргина на потенцијални пратенички места во мнозинскиот изборен систем. Претходните истражувања предвидуваа дека ќе освојат места со просечна предност од девет процентни поени. Сега тој процент скокна на четиринаесет.

Министри без мандати

Според истражувањето, доколку изборите се одржат денес, дури тринаесет членови на владата би ги изгубиле своите места во Вестминстер, вклучувајќи ја вицепремиерка и лидерка на партијата Анџела Рејнер, министерката за финансии Рејчел Ривс, министерката за внатрешни работи и ветеранка на лабуристите Ивет Купер, но и министерката за здравство, која се смета за политичка ѕвезда во подем, Вес Стритинг.

Главните причини зошто гласачите им го вртат грбот на Стармер и неговата влада се неисполнетите предизборни ветувања и ненадејните и неочекувани политички пресврти на левицата.

Една третина од гласачите се незадоволни од тоа како британската влада се справува со задачата за намалување на трошоците за живот. Повеќе од една четвртина од гласачите не го простуваат повлекувањето на надоместокот за зимско греење од пензионерите. Гласачите на лабуристите се свртуваат и кон реформистите поради имиграциската криза, чие решение не е на повидок, анализираат светските и регионалните медиуми.