Независниот кандидат за градоначалник на Скопје поддржан од граѓанската платформа „Независни заедно“, професорот Горан Марковски на денешната прес-конференција рече дека на Скопје му требаат функционални и безбедни мостови, кои ќе функционираат и ќе придонесуваат кон растеретување на сообраќајот во главниот град.

Тој денеска зборуваше пред мостот „Љубљанска“, кој е на територија на општина Карпош, а чиј проектант е токму професорот Марковски.

Меѓудругото тој истакна дека мостот не е пуштен во употреба, не функционира затоа што властите се конфронтираат меѓусебно во врска со еден дел од мостот во должина од 5 метри, кој треба да се доврши, но градот и општината ја префрлуваат надлежноста од еден на друг.

„Мојата визија за Скопје е град со значително поголема безбедност во сообраќајот, каде што ќе се мапираат сите критични точки и ќе се постави поголема сигнализација. Сепак, планираме и дестимулирање на возењето на автомобили. Јавниот транспорт и алтернативните превозни средства мора да станат наше секојдневие“, истакна Марковски.

Тој ја започна својата прес – конференција во „5 до 12“, затоа што, според него, алармот за Скопје е вклучен. Тој ги повика сите граѓани на 19 октомври да гласаат за бројот 128 за градоначалник и 39 за листата советници во Град Скопје предводена од Јана Белчева Андреевска, со цел да престанат лошите пракси и грубата партизација на градот и јавните претпријатија.

„Независни заедно“ е широка граѓанска платформа која ги обединува независните советници и локални иницијативи од неколку скопски општини-„Шанса за Центар“, „Зелените за Гази Баба“ и „Групација 389“.