Кошаркарите на МЗТ Скопје Аеродром попладнево му гостуваат на Задар во одлучувачкиот натпревар од бараж-серијата за влез во регионалната АБА-лига. Тренерот Ѓорѓи Кочов се соочува со проблеми на центарската позиција поради отсуството на повредениот Андрија Бојиќ.

– Одигравме два изедначени и цврсти натпревари против Задар, екипа за која настапуваат квалитетни и искусни кошаркари. Можевме уште во Скопје да го решиме прашањето околу влезот во АБА-лигата и на најдобар начин да го крунисаме тоа за што работевме цела година. Но и покрај поразот покажавме дека можеме да играме со Задар, кој е апсолутен фаворит ако ги земеме ростерите на двете екипи. Во Хрватска дојдовме сериозно ослабени, без повредениот Бојиќ, но тоа истовремено е шанса за другите играчи на тие позиции да го дадат максимумот и да ја искористат пружената шанса, изјави Кочов.

Натпреварот во Арена „Крешимир Чосиќ” почнува во 18 часот.