Не сакаме конфликти во регионот, порача претседателката на Словенија Наташа Пирц Мусар по денешната средба со српскиот претседател Александар Вучиќ во Белград. Таа додаде дека за смирување на ситуацијата се потребни двете страни, а Косово мора да го заврши својот дел.

Вучиќ се согласи со мене дека треба да продолжат разговорите со Приштина, да се смират страстите и дека никој во таа област не сака нови провокации. Односот меѓу Белград и Приштина е значаен за целиот регион на Западен Балкан и ќе покаже колку сите сме заедно зрели, и ние и Брисел за да ја смириме ситуацијата – вели таа.

Мусар, која е во работна посета на Србија, на заедничката прес-конференција по средбата со Вучиќ рече дека како правничка апелира за почитување на правото, дека сака Заедницата на српски општини да се имплементира што е можно поскоро како што е договорено во 2013 година, и не гледа причина за одлагање.

Претседателката на Словенија повтори дека дијалогот е единствениот вистински пат до решение, бидејќи се потребни двете страни за да се смири ситуацијата, но и дека „Косово мора да го направи своето“.

Таа се осврна и на демонстрациите што се одржуваат секоја недела во Белград и рече дека тие се легитимен чин во секоја земја и дека тоа е дел од демократијата, а медиумското покривање е дел од слободата на изразување, додавајќи дека тоа е нешто на кое треба да се работи.