Министерот за надворешни работи и надворешна трговија, Тимчо Муцунски, од утре започнува тридневна работна посета на Обединетото Кралство на покана на државниот секретар за надворешни работи, Комонвелт и развој, Дејвид Лами.

Како што соопшти Министерството за надворешни работи и надворешна трговија, Муцунски за време на посетата ќе оствари средба со својот британски колега Лами, како и со парламентарниот државен потсекретар и министер за услуги, мали бизниси и извоз, Гарет Томас.

Во рамки на програмата, министерот ќе учествува на бизнис-форум организиран од македонската Амбасада во Лондон, каде ќе ги претстави економските потенцијали на земјата пред британски компании. Исто така, во британскиот Парламент ќе има средба со членовите на Парламентарната група за соработка со Македонија.

Во тинк-тенкот „British Foreign Policy Group“, Муцунски ќе говори на тема улогата на Македонија во евро-атлантската безбедност и регионалната стабилност.

Посетата ќе вклучи и средби со македонски иселеници во Литлхамптон, каде министерот ќе ја посети црквата „Св. Ѓорѓи Победоносец“, фолклорна група и деца кои посетуваат настава по македонски јазик.

Од МНР информираат дека главна цел на посетата е продлабочување на билатералните односи и економската соработка, особено по потпишувањето на договорот за инвестициско партнерство. Ќе се разговара и за европската интеграција на земјата, како и за актуелни регионални и глобални прашања.