Министерот за надворешни работи Тимчо Муцунски попладнето се сретнал со амбасадорката на Хрватска во земјава, Нивес Тигањ.

„На средбата фокусот беше ставен на потенцијалите за унапредување на политичката и економската соработка, ги потврдивме традиционално силните и пријателски односи помеѓу двете земји, како и одличната соработка во рамките на регионалните и мултилатералните организации“, рекол Муцунски, според соопштението од неговиот кабинет.

„Упатив благодарност за искрената и силна поддршка за нашиот пат кон Европската унија и се согласивме дека проширувањето, кое треба да се случи што е можно поскоро, ќе биде поттик не само за земјите од регионот, туку и суштински интерес за самите земји-членки и за Европската унија“, додал министерот.