Министерството за труд и социјална политика вчера на својот сајт ги објави имињата, презимињата и адресите на 6.612 деца со посебни потреби кои примаат посебен додадок од државата за својата попреченост. Објавени се имињата, презимињата и адресите на родителите на чии сметки стига додатокот, како и на децата, а објавени се и нивните социјални броеви.  

Објавата предизвика вознемиреност кај родителите на децата со посебни потреби, кои се прашуваат со кое право Министерството ги објавило нивните лични податци, како и имињата на малолетните деца. Дел од родителите размислуваат за тужби, а некои организации за заштита на правата на децата веќе поднеле претставка до Народниот правобранител.

Со оваа објава целата македонска јавност доби увид за медицинските дијагнози на објавените деца, со оглед дека посебен додаток примаат деца до 26 години со: тешки, потешки или најтешки пречки во телесниот развојот, децата со умерена, тешка или длабока ментална попреченост, децата со најтешки облици на хронични заболувања, децата со најтежок степен на оштетување на видот, слухот или говорот, децата си аутизам, со Даунов синдром, со оштетен или изгубен порано стекнат говор и со повеќе видови на пречки (комбинирани) во развојот.

Освен имињата на децата, Министерството ги објави и имињата, презимињата и адресите на сите самохрани родители кои се евидентирани како корисници на гарантирана минимална помош, корисниците на право на социјална сигурност на стари лица, на правото на надоместок заради попреченост, како и оние пшто добиваат надоместок за помош и нега од друго лице.

На сајтот на Министерството е наведено дека списоците се објавуваат согласно член 17, член 18 и член 19 од Законот за заштита на лични податоци, а во врска со член 5 од Законот за финансиска поддршка на ранливи категории граѓани за справување со енергетската криза. Објавените корисници ќе добијат финансиска помош од по 3.000 денари месечно во наредните четири месеци.