Мостот на Ибар во Митровица ќе биде деблокиран „по неколку часа дневно“, како прва фаза од иницијативата за поврзување на јужниот дел на градот, населен со мнозинство Албанци, со северниот, каде што мнозинство жители се Срби. Ова е  една од формулите што сериозно се разгледуваат во дискусиите меѓу Владата на Косово и амбасадите на групата Квинта, пишува порталот „Националe“, пренесува МИА од Приштина.

Порталот пишува дека ова е почетен компромис меѓу две дијаметрално спротивни позиции: од една страна КФОР, кој никогаш не даде никакви индикации за преместување на своето стационирано присуство на мостот, и косовската влада, која го претстави отворањето како завршен чин или, како што рече министерот за внатрешни работи Џељаљ Свечља, како „затворен случај, конечна одлука“.

Според споменатото сценарио, наместо бетонска блокада на северниот дел од мостот на Ибар, предвидено е да се постават автоматски блокади што ќе се отвораат и затвораат во одредено време.

КФОР би можел да преземе „континуирано блокирачки пристап“ ако владата на Албин Курти реши да го отвори мостот „на своја рака“.

– Квинтата и КФОР не се изјаснија против отворањето на мостот, туку само против избраниот начин на косовската влада, која ги отфрли сите безбедносни грижи. Европската Унија дури смета дека ова прашање треба да биде вклучено во агендата на преговорите во рамките на дијалогот Косово-Србија во Брисел, иако се претпоставува дека овој случај е затворен уште во 2016 година – пишува „Национале“.