Со средба со германскиот канцелар Олаф Шолц, индискиот премиер Нарендра Моди денеска ја почнува европската турнеја во која ќе ја посети Франција и ќе учествува на нордиско-индискиот самит во Данска.

Во Берлин ќе се разговара за трговски и деловни проекти, а руската инвазија на Украина најверојатно ќе биде тешка тема бидејќи Њу Делхи одбива да ја осуди Москва и да се приклучи на санкциите против Русија.

Моди и Шолц, исто така, треба да се сретнат со деловните лидери додека се обидуваат да постигнат напредок во трговскиот договор меѓу ЕУ и Индија.

Германија е најважниот трговски партнер на Индија во ЕУ и шести најважен трговски партнер во светот, соопшти германското Министерство за надворешни работи.

Индо-германската средба е шеста од ваков вид, а последната се одржа во Индија во ноември 2019 година. Моди ќе биде во Данска и Франција во вторник и среда.

Моди ќе учествува на вториот индо-нордиски самит во Копенхаген, на кој ќе учествуваат Исланд, Норвешка, Данска, Шведска и Финска.