Опозициската ВМРО-ДПМНЕ со негласањето за разрешување на тројцата министри од Алтернатива на собраниска седница за реконструкција на Владата отворено покажа дека кокетира со партијата што ја предводи Африм Гаши. Денешното гласање по десетдневна дебата за разрешување на министерот за здравство Беким Сали, за информатичко општество и администрација Адмирим Алити и за дијаспора Џемаил Чупи, покажа дека парламентарното мнозинство, сепак, наместо за осум, се зголемило само – за еден пратеник! Дури и на него власта не може целосно да се потпре. Независниот пратеник Скендер Реџепи, но и „огнените отпадници“ од ДУИ, играат по свое, а Гаши не ги ни бранеше своите министри сопартијци.

Иако идејата на премиерот Димитар Ковачевски беше претходното мнозинството од 64 пратеника кога Алтернатива беше владин партнер, со влезот на АА, која има осум претставника во законодавниот дом да се зголеми на 72 пратеника, математиките не му се исполнија. Алтернатива ја напушти власта (има три пратеника), тројца пратеника од „огнените“ членови на ДУИ не дојдоа на седницата, а во пленарната сала не се појави ниту Павле Трајанов од Демократскиот сојуз, партија што неодамна ја напушти владината коалиција.

Впечатлива беше одлуката на најголемата опозициска партија да не гласа, иако пратениците беа во салата, бидејќи „сакале на чистина да го изнесат мнозинството, односно да покажат дека реконструкцијата на Владата му донела на мнозинството само половина пратеник“.

„Не гласавме за разрешување на министрите, бидејќи имаме ситуација на крпење мнозинство без јасна цел, без програма, без визија. Што би се рекло, ова е состојба во која од една страна крпат, а од друга страна им се кине владејачкото мнозинство. Едноставно, веќе целосно е изгубен легитимитетот на граѓаните. Креирањето на мнозинство во Собранието и менувањето не е базирано на принципи, туку на обичен „пазар 3“ апсурд, кој треба да ѝ даде живот уште некој месец на оваа клинички мртва Влада на Ковачевски“, изјави координаторот на ВМРО-ДПМНЕ Никола Мицевски.

Неофицијално, неизјаснувањето на пратениците од ВМРО-ДПМНЕ против или за разрешување на министрите се толкува дека опозициската партија подготвува терен за соработка со Алтернатива, откако доскорешниот нивен партнер на локално ниво, Алијанса за Албанците, се приклучи кон мнозинството. И десетдневната дебата покажа дека, иако пратениците од ВМРО-ДПМНЕ две недели расправаа за разрешувањето на тројцата министри, најмалку нив директно ги напаѓаа и целата дебата ја водеа против Владата во целина, и против премиерот Ковачевски и првиот вицепремиер Артан Груби.

Дека Владата не може во целост да смета на гласот на доскорешниот сопартиец на Алтернатива и независен пратеник Скендер Реџепи, покажа неговото изјаснување. Беким Сали беше разрешен со 65 гласа, без ниту еден „против“ и „воздржан“, додека Адмирим Алити и Џемаил Чупи беа разрешени со 64 гласа, еден „против“ и без „воздржани“. Реџепи гласаше за разрешување на Сали, но против разрешувањата на Алити и Чупи. Реџепи претходно го обвини Гаши дека за да ја спаси фотелјата на Сали, ја жртвувал партијата.

„Огнените“ пратеници од ДУИ – Изет Меџити, Мерита Коџаџику и Кастриот Реџепи – не присуствуваа на седницата. Меџити претходно изјави дека нема да гласаат за реконструкцијата на Владата, бидејќи нема предлог за смена на првиот вицепремиер Артан Груби.

Впечатливо е дека пратеникот и лидер на Алтернатива Африм Гаши, и пратениците Сафије Садики Шаини и Хусни Исмаили, не беа во салата за да ги бранат, односно да гласаат против разрешувањето на сопартијците Беким Сали, Адмирим Алити и Џемаил Чупи од министерските функции. И во текот на десетдневната расправа за нивно разрешување Гаши воопшто не се појави на пленарната седница.

Седницата за изборот на новите министри треба да продолжи во 20 часот по завршувањето на седницата за пратенички прашања. На почетокот на седницата за реконструкција на Владата, на 13 февруари, оставки поднесоа Никола Тупанчевски и Насер Нуредини од ресорите правда и животна средина. Ковачевски за нови министри ги предлага Кренар Лога за ресорот правда, Фатмир Меџити за здравство, Азир Алиу за информатичко општество и Каја Шукова за животна средина.