Минусните температури што веќе десетина дена владеат во земјава, ќе го проретчат родот кај овошките, а на удар се бадемите, кајсиите, праските и сливите, кои се во фаза на полно цветање. Штетите ќе зависат од времетраењето на студените ноќи и утра, а цветот на овошките може да издржи и минус два степени, но деновиве се бележат и до минус 10 степени, велат агрометеоролозите. И дел од регионот веќе пријавува штети кај раните овошки, што секако ќе влијае и врз квалитетот, но и врз цената на увозните овошја не само како свежи, туку и кај суровини за конзервната индустрија.

– Снегот предизвикува механички оштетувања на растенијата, но доколку продолжат минусните температури, овоштарите ќе имаат проблеми – велат експертите.

Ваквата ситуација се повторува неколку години наназад и тоа токму кога поголемиот дел од овошките веќе се во цут или во фаза непосредно пред цветање. Најмалку се загрозени јаболката и малините, бидејќи сѐ уште не почнале да цветаат. Драганчо Николов, советник во Агенцијата за поттикнување на развојот на земјоделството за МИА, подрачна единица Кавадарци, потврди за МИА, дека ниските утрински температури веќе направиле големи штети кај овошките во Росоманско.

– Според информациите со кои располагаме, температурите се спуштиле до минус четири, а некаде и до минус седум степени – појасни Николов.

Тој истакна дека првичните согледувања од стручни лица на терен, говореле дека има големи штети во овошните насади во Росоманско.

– Станува збор за регион што е најголем производител на праски во државата. Првите проверки на терен велат дека голем е данокот што и овој пат го имаат земено ниските утрински температури на прагот на пролетта. Штети има кај дрвцата праски, кајсии, бадеми, кои во овој период од годината се во фаза на полнo цветање. Најголеми се штетите во Росоман и росоманските села Манастирец и Трстеник, подвлече Николов.

Тој додаде дека дополнително ќе се утврдува процентот на штети кај овошките. Засега, во лозарството немало оштетувања од ниските утрински температури што го зафатија овој регион изминатите два дена.

Според последната анализа на Стопанската комора, наместо кашички за деца од праски, крушки или јаболка, нашата земја сè уште извезува само свежо овошје, што ни носи помалку девизи. Од друга страна земјава е голем увозник на преработено овошје во мармалади, џемови и други овошни намази. Според податоците на „Тренд економи“, во 2023 година во Македонија биле увезени вакви производи за речиси 3 милиони евра. И тоа најмногу од Србија – 41 отсто, Грција -105 отсто и Австрија – 9,46 отсто. Мармалади, џемови, слатка и овошни желеа увезуваме и од Германија, Хрватска, Унгарија, Италија, Турција итн. Од извозот на овие овошни преработки во истата година сме заработиле речиси 9 милиони евра, а наши најголеми пазари биле Србија, Албанија, БИХ, Црна Гора, Бугарија итн.

Дунавските овоштари бараат итна помош, пријавуваат 100-процентно замрзнување на кајсиите

Овоштарите од Дунав бараат итна помош во максимално дозволена сума за поддршка на повредените земјоделци. Во Североисточна Бугарија, поточно во регионите Русе, Силистра, Разград, Велико Трново и Тутракан, 100 отсто од кајсиите беа измрзнати и над 50 отсто од некои други култури. Штетите за овоштарите се катастрофални, па Сојузот на дунавските овоштари со писмо побара поддршка до министерот за земјоделство Георги Тахов и извршната директорка на Државниот фонд „Земјоделство“, Ива Иванова.

Покрај климатските промени, овоштарскиот сектор мора да се справи и со постојано зголемените трошоци за физичка работа, без кои производството на овошје е невозможно. Високите цени на горивата, на производите за заштита на растенијата и на ѓубривата даваат увид во некои од тешкотиите со кои се соочува овоштарскиот сектор денес, пишува синдикатот, објави „АгроТелеграф.бг“.