Денеска, на состанокот со кој претседава Бразил, министрите за здравство на земјите од Г20 поддржаа нова рунда инвестиции во рамки на финансирањето на Светската здравствена организација (СЗО).

Министрите ги повикаа сите членки и партнери да придонесат во првиот круг на финансирање за инвестирање во новата глобална здравствена стратегија на СЗО, чија цел е да го подобри животот на милијарди луѓе и да спаси 40 милиони животи, објави СЗО, пренесе Еуроњуз.

Директорот на СЗО, Тедрос Адам Гебрејесус изјави дека досега на овој начин се обезбедени една милијарда долари и дека 63 земји се обврзале да дадат свој придонес.

Претстојниот самит на Г20 на 18-19 ноември, со кој ќе претседава бразилскиот претседател Луис Игнасио Лула да Силва, ќе биде клучен за собирање средства за СЗО.

Министрите на Г20 ја поздравија најавата на министерот за здравство на Јужна Африка, Пакиша Арон Моцоаледи, дека земјата е посветена на спроведувањето на агендата за одржливо финансирање на СЗО за време на нејзиното претседавање со Г20 следната година.