Околу 260 милиони христијани во светот доживеаја „тежок прогон“ во 2019 година и оваа бројка расте, иако бројот на убиени поради својата вера паѓа, се наведува во извештајот на невладината огранизација „Отворена врата“ кој денес беше објавен.

Како што пренесува „Индекс“, оваа организација објави годишен индекс на петнаесет земји во кои христијаните најмногу се прогонувани, а го опфаќа периодот од ноември 2018 до октомври 2019 година.

– Вкупно 260 милиони христијани – католици, православци, протестанти, баптисти, евангелисти, пентекосталисти – биле тешко прогонети, а една година претходно бројката изнесувала 245 милиони – наведува организацијата.

Под прогон се подразбира насилство, кое може да оди до убиства, но и секојдневното, помалку забележливо угнетување.

– Таквиот пораст се толкува со влошувањата на состојбите на верска слобода во Кина на државно ниво, кое се шири на сѐ поголем број на покраини и ширење на џихадизмот во Африка – пишува оваа невладина организација.

Бројот на убиени христијани падна од 4305 на 2983, или за 31 отсто во однос на претходната година.

Сепак, Нигерија и понатаму води меѓу земјите со најголем број на убиени христијани поради својата вера (1350 мртви).

Ако се земат во предвид сите облици на прогон, Северна Кореја и понатаму е на врвот на годишната табела, а следат Авганистан, Сомалија, Либија, Пакистан, Еритреја, Судан, Јемен, Иран и Индија.

Фото: EPA/ALESSANDRO DI MEO