Претседателот на Црна Гора Јаков Милатовиќ изјави дека  признавањето на Косово, членството во НАТО и санкциите против Русија се завршена работа за Црна гора.

Во интервјуто дадено за РТВ Словенија, запрашан за коментар за односот на Црна Гора со Србија и Русија и влијанието на Српската православна црква, Милатовиќ изјави дека поранешниот претседател Мило Ѓукановиќ го внел прашањето за црквата во секојдневната политика и дека тоа е ставено ад акта.

Тој смета дека политичарите во Црна Гора сега имаат фокус на теми кои се од суштинско значење за граѓаните, а тоа се економскиот и животниот стандард, владеењето на правото и европската интеграција.

„Додека не делеа и го ставаа фокусот на тие поделби, она што се случи беше дека мал круг на луѓе поврзани со претходната владејачка структура стана многу богат, постојано плашејќи го народот и промовирајќи разни невистини за ова или она влијание во Црна Гора, се со цел да останат што подолго на власт“, ​​рече Милатовиќ.

Тој изрази надеж дека Црна Гора со помош на своите стратешкипартнери ќе стане полноправна членка на Европската унија во следните 4-5 години.

Во април оваа година, проруските партии во Црна Гора иницираа повлекување на признавањето на Косово. Независноста на Косово беше признаена од Владата на Црна Гора во 2008 година, кога на власт беше Демократската партија на социјалистите (ДПС) на Мило Ѓукановиќ, која во август 2020 година ги загуби изборите од просрпскиот и прорускиот Демократски фронт, Демократите и движењето УРА.

Црна Гора, членка на НАТО, ја усогласи својата надворешна политика со Европската унија (ЕУ) во однос на руската агресија врз Украина.