Грчкиот премиер Киријакос Мицотакис одржа вонреден состанок со сеизмолозите, експертите и претставниците на владиниот кабинет, на кој се разговараше за неодамнешната сеизмичка активност во морската област меѓу Санторини и Аморгос, каде во неколку дена се регистрирани стотици земјотреси.

За време на средбата, сеизмолозите ја анализираа ситуацијата и констатираа дека моменталната сеизмичка активност наликува на онаа од 2011-2012 година, но со поголем интензитет и поголем просечен број на потреси.

Најголемиот страв е поврзан со можноста за земјотрес над 6 степени според Рихтеровата скала. Евалуација на мерките ќе се врши секојдневно.

Претседателот на Организацијата за планирање и заштита од земјотреси, професор Ефтимиос Лекас свика итен состанок на Постојаниот научен комитет за проценка на сеизмичка опасност и Постојаниот научен комитет за следење на грчкиот вулкански лак.

Целта беше да се процени сеизмичката активност и да се преземат можни превентивни мерки.

Комитетот препорача затворање на училиштата во Санторини и избегнување масовни собири во затворен простор.

На граѓаните им се препорачува и да избегнуваат престој во близина на пристаништата Амуди и старото пристаниште Фира, за да се осигури нивната безбедност во случај на посилен земјотрес.

Научниците продолжуваат да го следат развојот на сеизмичката активност за да ги проценат понатамошните активности што може да бидат неопходни.

На Санторини се затвораат училиштата и се забрануваат собири во затворен простор поради честите земјотреси