Премиерот и лидер на ВМРО-ДПМНЕ, Христијан Мицкоски, денеска изјави дека на претстојните локални избори очекува кампања во која ќе преовладуваат „шпекулации, конструкции, подметнувања и невистини“ од страна на опозицијата и нејзините поддржувачи.

Во одговор на новинарско прашање, Мицкоски посочи дека неговата партија и коалициските партнери ќе настапат со конкретни резултати и реализирани проекти.

„Имаме со што да излеземе пред граѓаните – што сме направиле во општините во изминатите четири години, како и во централната власт во последните 15 месеци. Ќе ја покажеме разликата меѓу седумте години кога ДУИ и СДСМ беа на власт и овие четири години кога општините и Владата се управувани од оваа коалиција“, рече Мицкоски.

На настанот беше формализирана коалицијата „Твоја Македонија“, составена од 25 партии со различен политички и општествен карактер. Со потпишување на документот „Декларација за Македонија на граѓаните и за општини што создаваат иднина“, коалицијата ја потврди заедничката платформа за обезбедување напредок и иднина.

Мицкоски потенцираше дека локалните избори се клучни поради тоа што директно влијаат на секојдневниот живот на граѓаните во општините, како и поради изборот на луѓе кои ќе ги бранат интересите на народот.

„Уверени сме дека силата на државата се мери преку секојдневниот живот во општините. Нашата визија за „Твоја Македонија“ е визија за силни граѓани, силни општини и силна држава“, порача премиерот.