Тешка година со почеток во минус, но со макотрпна работа поставени се темелите на новата иднина во која се очекува економски раст, инвестиции и просперитет, е оцената на премирот Христијан Мицкоски во отчетот за првата година од „чесното и одговорно владеење“ на Владата. Премиерот критикуваше дека и натаму нема резултати во правосудството и оти најголем предизвик е воспоставување систем што ќе испорачува правда и во кој нема да може да функционира системот на бандитизам создаден од политички и бизнис-структури кои работат во широка коалиција.

– Секој нов почеток е уште потежок, затоа што наследуваш веќе стекната состојба и, како што вели народот, не почнуваш од нула туку од минус. И повторно градиш темели, одново поставуваш столбови и ги засилуваш носечките што дотогаш биле дотраени, кршени, уривани. Тие нови темели стануваат фундамент на новата иднина што заеднички ја градиме, тие нови темели се секојдневната борба за тебе и твојата иднина – рече Мицкоски.

Мицкоски: Веќе вклучуваме во петта, па шеста брзина

Тој посочи дека и минатата година напорно работеле на посветеност и на враќање на довербата, консолидирање на состојбите и стабилизација. Се пофали дека реализирале и почнале над 250 поголеми проекти и најави дека за повеќе од трипати ќе се зголеми бројот на проекти за следната година.

– Веќе вклучуваме во петта, па шеста брзина. И очекувам максималната посветеност во исполнување на програмата, очекувам повеќе од 400 проекти, мерки, чекори и реформи во наредниот период, кои ќе бидат насочени на развој и раст, подобар стандард, поквалитетно образование, борба против корупција, инвестиции и реформи во здравството, големи проекти во инфраструктурата, реформи во даночната политика и справувањето со инфлациски и предизвици на животниот стандард, проекти за млади, проекти за земјоделци, проекти за работници, проекти за купување на нов дом, возила, проекти што ќе го донесат времето за кое сите се надеваме и длабоки промени што ги заслужуваме – рече премиерот и додаде дека економијата останува главен фокус.

Мицкоски се пофали со раст на платите и на пензиите и со рекордно историско најголемо ниво на странски инвестиции од 1 милијарда и 255 милиони евра, односно дека има најголем број странски директни инвестиции по глава на жител во овој дел од Европа. Тој истакна дека отпочнале борба против криминалот, дека спровеле акции против тие што се сметале за недопирливи, дека силно удриле по скопските наркобанди. Не е задоволен од борбата за независно судство и обвинителство, тоа ќе биде најголем предизвик, додаде премиерот.

– Не сум задоволен од динамиката на испорачување на правдата од страна на обвинителите и судиите и постојат очигледни спреги меѓу тој свет и светот на политичката бизнис-мафија, која го конструирала тој систем против кој сакаме да се бориме. Ако ме прашате мене, јас очекувам одговорност и народот очекува одговорност и тоа мора да биде прва работа што ќе нè води – да донесеме правда и да го урнеме тој систем на бандитизам, создаден од политички и бизнис структури, за кои нема ни етнички и политички разлики, туку функционираат во широки коалиции. Тоа ќе биде нашиот најголем предизвик во периодот што следува и од таа динамика ќе зависат многу следни политички случувања во државата – рече Мицкоски.

За трагедијата во Кочани, повтори дека му бил најтешкиот ден како премиер, дека тој не можел да ја спречи, но дека ќе направи сè да не се повтори.

– Како политички фактор од првиот ден испративме реална порака дека правда мора да има и без оглед за кого станува збор мора да има одговорност. И денес стојам на истиот став, а Обвинителството е на тест да докаже вистина и судот да спроведе правда. Сакам да соопштам дека работиме како Влада на обезбедување историски највисок инвестициски пакет за обнова и поддршка на Кочани. Да покажеме дека Кочани за нас е важно и дека граѓаните не се сами – рече Мицкоски.

Премиерот ни збор не кажа за евроинтеграциите, ниту што сторила Владата во изминатава година, ниту, пак, најави што планира за годинава.

– Сакам да се осврнам и на оние што велат дека Македонија била понижена. Тоа се истите оние што сменија име, направија договор со Бугарија, кои ја пљачкаа и се потпишуваа на сè што им беше поставено на маса. Нема никогаш повеќе да дозволам да биде понижена, затоа што тоа време заврши – рече премиерот.

Владејачката Вреди, пак, преку соопштение се пофали со своите дела како владин партнер, коишто се, како што велат, нивна лична карта. Оценуваат дека е направена револуција во јавната администрација.

– За неколку месеци се реализираа 2.500 работни места и 800 напредувања за Албанците, или повеќе од ДУИ за цел мандат. Најдобрата година на вработување за Албанците во историјата на земјата. Триста милиони евра се доделени на албанските општини, со конкретни проекти во сите региони. Во секој сектор, Вреди покажа дека промената не е слоган, туку стратегија и систематска работа – велат од Вреди.

СДСМ: Мицкоски е изгубен во сопствените лаги

Опозицијата ја критикуваше Владата дека ја погазила правдата и ја понижила Македонија и дека за една година власт на ВМРО-ДПМНЕ има нула резултати. Од СДСМ реагираат дека обраќањето на Мицкоски е уште една потврда дека тој е „изгубен во сопствените лаги“, додека граѓаните се соочуваат со економска криза, нови задолжувања и пад на животниот стандард.

– За една година власт, ВМРО-ДПМНЕ, Вреди и ЗНАМ ја претворија Македонија во земја на понижени работници, посиромашни граѓани и опасно задолжена држава. Поразителни се податоците на Евростат, работниците во Македонија денес се на дното на Европа, со најниски плати и најнизок животен стандард. Наместо „горди работници“, имаме понижени луѓе што со тешка мака ја преживуваат секоја недела. Владата нема план, нема политика, нема решенија. Економијата оди надолу. Со оваа власт најлошото допрва доаѓа – рече Богданка Кузеска, портпаролка на СДСМ.

Доскорешниот министер во Владата на Мицкоски, Арбен Таравари, сега во опозиција, е разочаран од владеењето на ВМРО-ДПМНЕ, ЗНАМ и Вреди.

– На годишнината од владеењето, не можам да не изразам разочарување дека Вреди од прекрасен проект брзо се претвори во неуспешен обид… Промената не значи промена на имињата на партиите, туку на нивниот менталитет – вели Таравари.