Мицкоски: Договорена каматна стапка од 1,95 процент за унгарскиот кредит за компаниите
За да добијат кредит компаниите ќе треба да имаат минимум 20 отсто сопствено учество. Максималниот износ што може да го добијат е ограничен на 10 милиони евра
Премиерот Христијан Мицкоски најави дека е договорена „историски најниска“ каматна стапка од 1,95 отсто од банки за компании што бараат средства од унгарскиот заем.
Препорачано
– Од неколку од банките веќе имаме потврда и очекувам најголем дел од нив да застанат зад проектот и конечно 250-те милиони евра од унгарскиот заем да бидат поделени на македонското стопанство, порача денеска премиерот Мицкоски.
Тој додаде дека е договорена каматна стапка од 1,95 проценти, до три години грејс период и до 15 години рок на отплата во зависност од потребите на компаниите.
– Ценам дека е ова историски договор со историска најниска каматна стапка – изјави Мицкоски при посетата на скопското село Булачани, каде што присуствуваше на пуштање во употреба на новата спортска сала во ООУ „Наум Охридски“.
За да добијат кредит компаниите ќе треба да имаат минимум 20 отсто сопствено учество. Максималниот износ што може да го добијат е ограничен на 10 милиони евра.
– Тоа значи дека ќе имаме инвестициски бран од 300 милиони евра. Сите компании ќе имаат можност да ги вложат овие средства во основни средства за работа, во обновливи извори на енергија, како и во објекти што ќе ги користат како свои административни згради, односно за сопствена потреба – изјави премиерот.
