Со 250 милиони евра Владата најави дека ќе им помага на сите општини во земјава за инфраструктурни и капитални проекти.

Целта на овој отворен јавен повик, како што соопшти премиерот Христијан Мицкоски е да се доделат средства на општините за проекти со чија реализација ќе придонесе за унапредување на инфраструктурата на локално ниво со директено влијание врз зголемување на економскиот раст, развој во општините и зголемување на квалитетот на живот на граѓаните.

На прашањето зошто Владата не помогне со набавка на нови автобуси во Скопје, Мицкоски вели дека набавката на автобуси за главниот град не претставува проблем, но има и други градови кои имаат потреба од автобуси.

– Јас мислам дека доволно пати покажавме конструктивност иако можеби тоа не го заслужуваше градоначалничката Данела Арсовска и мнозинството во Советот. Така што ние стоиме на располагање да слушнеме план и да го поддржиме. Но, ако планот е да гласаме за кредит за автобуси што ќе стигнат следната година, тоа не го решава проблемот што денес го имаат скопјани. Проблемот се решава со мобилизација на ЈСП, со вистинско трошење на средства што скопјани ги даваат како субвенција на ЈСП и на тој начин се решава проблемот, но тоа не може да го стори Владата, туку менаџментот на Град Скопје – додаде тој.

Премиерот изјави дека уште кога биле во коалиција со Арсовска за време на Локалните избори во 2021 година понудиле решение – компанија која ќе отвори фабрика за електрични автобуси. Но, тој вели дека сè останало на иницијатива на едната страна.

– Инаку да, точно е дека како Влада размислуваме за сите општини, на цела територија на државата. Потреба од автобуси имаат и Тетово, Битола, Прилеп, Штип, Кавадарци, Охрид. Ако на Скопје му требаат 250 автобуси и на другите градови сигурно им требаат уште толку автобуси – вели Мицкоски.

Во однос на проектот што Мицкоски денеска го најави со министерот за локална самоуправа, Златко Перински, право да поднесуваат апликации и предлог-проекти имаат општините на територија на цела држава. Општините можат да аплицираат со еден или повеќе инфраструктурни проекти од областа на културата, спортот, животната средина, патната инфраструктура, како и од областа на социјалната политика и образованието.

Средствата ќе се доделат преку шесте ресорни министерства соодветни од областа на проектите – Министерството за култура и туризам, Министерството за транспорт, Министерството за социјална политика, демографија и млади, Министерството за образование и наука, Министерството за животна средина и просторно планирање и Министерството за спорт.

– Овие пари значат повеќе проекти и решенија за граѓаните за нови улици, булевари, училишта, градинки, водоводи, канализации, сè она што во суштина им е потребно на граѓаните. Ова е прв ваков проект од толку обемен карактер за инфраструктурен развој на општините во историјата. 250 милиони евра од централниот буџет за вистинските потреби на граѓаните – изјави Мицкоски.

До крајот на оваа година со овој јавен повик на располагање за општините се ставаат шест милијарди денари, и ова е првата фаза од вкупно 15 милијарди денари или 250 милиони евра за капитални проекти.