Девет години по потпишувањето на Договорот за заедничко управување со границите меѓу Косово и Србија, Србија започна да го почитува и спроведува овој договор.

Заедничкото управување со границите беше потпишано во 2011 година кога косовската министерка за дијалог Едита Тахири преговараше во име на косовската страна, а од страната на министерството за Косово и Метохија беше Борко Стефановиќ. Тогаш Тахири изјави дека Србија законски ја признала независноста на Косово, додека српските дипломати рекоа дека потпишувањето на договорот не значи признавање на Косово.

Американската влада и претставникот на Трамп за дијалогот, Ричард Гренел реагираа на почетокот на спроведувањето на овој договор од страна на Србија. Тие и честитаа на Србија бидејќи веќе се согласија да воспостават царина во заедничката зграда финансирана од Европската унија на граничната точка во Мердаре која Србија сè уште ја нарекува административна линија.

„Одличен потег. Благодарност до претседателот Трамп. Србија го прави функционален преминот во Мердаре“, се вели во реакцијата на Ричард Гренел.

И амбасадорот на САД во Белград овој потег на Србија го поврза со договорот од 4 септември во Вашингтон, каде страните се обврзаа на создавање на Мини Шенген.

За разлика од српските гранични служби, косовската полиција уште од 2017 година е сместена во зградата на Европската унија за заедничко управување со границите.

„Косовската полиција, во овој случај граничните службеници навреме беа сместени во објектот и ги извршуваат своите должности според законските овластувања и надлежности“, соопшти Кабинетот за информации на косовската полиција.

За разлика од граничниот премин Мердаре, сè уште нема информација дали Србија и Косово ќе најдат механизам да ги регулираат илегалните премини, кои покрај официјалните административни пунктови на северот на Косово, Јариње и Бирњак служат за шверц на разни стоки меѓу кои и македонски јогурт.

На почетокот на минатата година „Правда на Косово“ емитуваше видеа од шестмесечна истрага за шверцерски врски со полицијата во Лепосавиќ и Зубин Поток со ексклузивни снимки за транспорт на стока од Србија до Косово преку нелегални патишта. Тимот ексклузивно објави снимки од шверцувани камиони кои поминуваат пред очите на полицијата.

Набргу потоа беа уапсени 19 полицајци на северот на Косово под сомнение за „криумчарење стока“, „злоупотреба на службена должност“, „мито“ и „забранета трговија“.