Министерот за здравство Фатмир Меџити вели дека уште пред да дојде на функција се интересирал за состојбата на Клиниката за онкологија и радиотерапија и имал индиции оти во минатото се случила некоја злоупотреба. Меџити истакна и дека го знае случајот со медицинската сестра, па откако е тој министер, побарал од Инспекторатот да направат контрола. Тие биле на Клиниката за онкологија и радиотерапија и извршиле контроли во период од први јануари 2022 година, до 31 октомври таа година. За овие десет месеци, министерот соопшти дека нема некои пропусти, во секојдневното работење на клиниката.

Но, тој потврди дека од Инспекторатот немале ингеренции во однос на лековите.

Одговарајќи на новинарско прашање околу КАТО системот за контрола на терапиите на пациентите на Клиниката за онкологија и радиотерапија, министерот појасни дека според стручнуте лица станува збор за добар систем, дека во милилитри го следи како се троши одредениот лек во дози, но не значи дека системот препознава лек, може да се стави и вода на тој систем.

Тој додаде дека сега, изминативе месеци на клиниката се работи совесно и транспарентно. Се размислувало дали овој систем да биде ставен во функција, или да се воведе друг, за да се организира целата работа. Министерот нагласи дека за секоја евентуална злоупотреба, ќе се сноси одговорност. Притоа повика во целата оваа работа да нема шпекулации, бидејќи во прашање се животи на пациенти, од кои некои, поради недоверба, бараат алтернативи или народски кажано, „бабини рецепти“. Тој нагласи дека на клиниката има врвни стручни лица, целата медицинска фела да не се става во ист кош, а правдата да им се препушти на надлежните органи.

Заради процесот во Обвинителство, да не се штети на тој процес, тој подвлече дека не може да сподели повеќе информации за јавноста. Министерот рече дека будно ги следат сите состојби во здравството и ги решаваат работите, осврнувајќи се на преземени мерки, за подобри здравствени состојби.

Во однос на долговите, рече дека долгот на клиниката веќе е преполовен.