Кинеската PDD Holdings, која стои зад популарните платформи за онлајн купување Pinduoduo и Temu, ги надмина очекувањата на аналитичарите во вториот квартал. Компанијата објави закрепнување на домашната побарувачка и силен раст во своето меѓународно работење, и покрај неизвесностите во глобалната трговија.

Приходите на PDD достигнаа 103,98 милијарди јуани (околу 14,53 милијарди долари) во вториот квартал, што е зголемување од седум проценти во однос на истиот период минатата година. Бројката ја надмина просечната проценка на аналитичарите од 103,34 милијарди јуани- пишува Каматица.

Од друга страна, прилагодената нето добивка што им се припишува на акционерите изнесуваше 32,71 милијарди јуани (околу 4,57 милијарди долари), што е намалување во однос на 34,43 милијарди јуани минатата година. Сепак, оваа вест имаше позитивен ефект врз инвеститорите, па акциите на компанијата што го поседува TEMU на американската берза скокнаа за речиси 12 проценти.

Кинеската влада активно ја поттикнува домашната потрошувачка за да ја оживее економијата што се соочува со предизвици како што се кризата со домувањето и новите трговски политики. Затоа, водечките компании за е-трговија, вклучувајќи ги PDD, JD.com и Alibaba, ги засилија промотивните активности и понудија значителни попусти, што доведе до зголемена побарувачка, но и до засилена ценовна војна на пазарот.