Австрија најави дека во борбата против инфлацијата ќе го зајакне надзорот на малопродажните компании и наплатата на даноците за дополнителна добивка во енергетскиот сектор. Малопродажните синџири во Австрија ќе мора да ги објават набавните цени.

Компаниите од прехранбениот сектор, во кој доминираат синџирите супермаркети „Реве“, „Алди“, „Лидл“ и „Шпар“, во иднина ќе треба да ги објавуваат трошоците за набавка на основните прехранбени производи, објави Каматица. Владата ќе го заостри оданочувањето на дополнителната добивка во енергетскиот сектор доколку компаниите доброволно не ги намалат цените, најави канцеларот Карл Нехамер.

Според процените на европскиот статистички институт Еуростат, инфлацијата во Австрија во април изнесувала 9,6 отсто и е значително над просекот на еврозоната, каде што потрошувачките цени се за седум отсто повисоки во однос на истиот период лани.