Францускиот претседател Емануел Макрон ја повика Европа да ги зголеми инвестициите во вселената, бидејќи, според него, таа ќе биде следната граница на конкуренција меѓу светските сили.

Зборувајќи на Парискиот авио-саем, откако Франција ја презеде контролата врз „Еутелсат“, Макрон повика на проширување на европските системи за лансирање сателити, додека говореше за стратегија за спротивставување на интересите на сопственикот на „СпејсИкс“, Илон Маск, од ракети до телекомуникации, објави „Ројтерс“.

Европа со години се бори да биде во чекор со САД и Кина во вселената.

Компаниите „Ербас“, француската „Тејлс“ и италијанската „Леонардо“ се борат да заработат пари и сакаат да ги спојат активностите, а Макрон им порача на тие компании дека имаат целосна поддршка од Франција.

Поради поевтините сателити во ниската Земјина орбита што ги распореди СпејсИкс, трите компании соопштија дека имаат планови за заедничко вложување.