Економските предизвици и заложбата за продолжување на координацијата помеѓу Министерството за финансии и Народната банка во насока на донесување политики што ќе бидат одржливи и во интерес на граѓаните и на стопанството, биле во фокус на денешната средба помеѓу министерката Гордана Димитриеска-Кочоска и новиот гувернер, Трајко Славески.

Како што соопштија од кабинетот на министерката, на средбата се говорело и за тековната макроекономска стабилност, која е приоритет којшто треба и понатаму да се одржува и унапредува преку добро усогласени и координирани политики.

– Беше истакната важноста на блиската соработка помеѓу фискалната и монетарната власт за обезбедување предвидлива економска средина, како основен предуслов за побрз економски раст – се додава во соопштението.

Дополнително, било нагласено и значењето на координираниот пристап меѓу сите финансиски регулатори во земјата, за да се овозможи понатамошен развој на стабилен, конкурентен и инклузивен финансиски систем, кој треба да биде отпорен на надворешни шокови и во функција на долгорочен економски напредок.