Македонија полека го добива своето место меѓу најпопуларните кампинг дестинации, а три кампа лоцирани во Струга на Охридското Езеро, се оценети со највисоки оценки 4,8 и 5 на водечката европска платформа кампинг.инфо, најпосетуваниот онлајн водич за кампување во германското говорно подрачје, кое нуди преглед на над 23.000 кампови од 44 европски земји.

Иако се проценува дека земјава може да оствари 1 милион ноќевања од автокамперскиот туризам, засега љубителите на ваквиот начин на одморање, главно се транзитни туристи, кои не се задржуваат повеќе од ден или два во домашните автокампови.

Подолг период се најавува усогласување на законите за градежно земјиште и за автокамповите, со што ќе се допрецизираат одредени нејаснотии, по што Агенцијата за промоција и поддршка на туризмот и Министерството за транспорт и врски, конечно би требало да донесат подобрена верзија на актуелниот Закон за автокампови, кој патем речено датира од 2014 година.

– Поради овој вакуум простор, дефакто и дејуре, автокамповите на територијата на државата се непостоечки.

Агенцијата почнувајќи од минатата година многу поактивно работи и ќе работи на нови инвестиции и нови автокампови во државата, со кои ќе се доближиме до стандардите за овој вид сместување што владеат во регионот и во ЕУ.

Убеден сум дека годишно може да оствариме еден милион ноќевања, ако нашите автокампови бидат типизирани според светските – посочи поранешниот директор на АППТ, Љупчо Јаневски.

Никола Кукунеш, раководител на автокампот „Скаут“ од Струга, кој највисоко е оценет од странските туристи за „Слободен печат“ вели дека ваквото признание се добива само со постојано вложување и напор за максимално исполнување на се она што е ветено. Овој кампинг постои веќе пет сезони и лани странците како гости биле побројни од домашните.

Почната е претсезоната, но ударни се јули и август, кога имаме најмногу гости. Максимално се трудиме да ја подобриме понудата, да имаме врвна услуга и хигиена.

Основната цел е како да ги натераме гостите да се задржат повеќе, кои сега само транзитираат низ земјава.

За жал, немаме пристап до странските платформи, но од гостите добиваме сознание дека сме високо ценети.

За време на короната, и неможноста за патување надвор од земјава имавме и повеќе домашни гости, но сепак, странците се тие кои се решаваат да престојуваат кај нас – објаснува Кукунеш.

Раководниот тим на овој камп нуди и други атрактивни можности, како планинарски тури или нуркање во водите на Езерото, а за оние што немаат своја кампинг опрема, се нудат дури и комплетно наместени шатори.

Сезоната за кампување е отворена уште во март и во уште еден струшки камп „Лејк Сајд“, кој исто така добил висока оценка од гостите. И оттаму за нашиот весник велат дека прекрасната и чиста природа, бистрите езерски води и квалитетното сместување се доволна причина за да се вратите повторно.

Најчести гости ни се од Холандија, Германија, Полска, а од јули до септември сме полни.

Се трудиме да обезбедиме врвна услуга, а наша цел е да ги задржиме гостите што е можно повеќе, оти сега нивниот престој се сведува на два до три дена – ни рекоа во „Лејк Сајд“.

Последните туристички статистички податоци за март покажуваат дека само 42 туристи престојувале во некои од македонските кампови, а бројот на ноќевањата е 84.

Сакаат да кампуваат ама на диво

Со години на повеќе места низ државата никнуваат диви кампови, но лани во август имаше две полициско-инспекциски интервенции за дислокација и тоа во двата Национални паркови – Галичица (во месноста Рајца, село Љубаништа и во месноста Дешат, кај селото Жировница во Маврово.

Сите што поставуваат шатори или камп приколки вон организираните кампови се натрапници и узурпатори на државен или приватен имот во државата, па поради тоа и се случија полициските интервенции.

Ова треба да биде опомена и уште еден показател дека треба да се забрзаат иницијативите за нови и европски уредени автокампови во државата.

Според законот, кампувањето и палењето огнови е забрането во границите на природното наследство.

Уште поголем проблем е загадувањето на животната средина, бидејќи на локациите на кои се сместуваат дивите кампери, нема санитарни чворови, канализација и вода за пиење.

Голем број на странски кампери во недостиг на доброорганизирани, уредени и промовирани кампови во Македонија се решаваат на диво поставување на својата опрема или пак ја сметаат земјава, како транзитна – објаснуваат експерти за „Слободен печат“.

Хрватските кампови се втори најскапи во Европа

Хрватските кампови се втори најскапи во Европа, само Италија е поскапа, покажува анализата на водечкиот европски портал кампинг.инфо. И покрај тоа, само во мај, хрватските кампови остварија речиси милион ноќевања, објави Н1.

Сместувањето во модерни подвижни домови, во срцето на сезоната, достигнува вртоглави 290 евра. Можеби се скапи, но по квалитет хрватските кампови се пред Италија, Франција и Шпанија.

Во последните десет години се инвестирани значителни средства во секторот за кампување. Статистиката ги поддржува овие тврдења.

Во камповите, лани се поминати над 1.500.000 ноќевања, што е зголемување за 17 отсто во однос на претходната година.