Мајкл Џеј Фокс ги откри своите тековни здравствени проблеми, 30 години откако му беше дијагностицирана Паркинсонова болест.

Ѕвездата на „Враќање во иднината“ откри дека е благодарен што ги надминал „најмрачните моменти“ од својот живот откако му бил отстранет туморот на ’рбетот.

Зборувајќи за магазинот „Пипл“ за своите животни борби, 59-годишниот актер објасни дека неговиот најлош момент настапил кога ја скршил раката при паѓање. Во своите мемоари „Нема време како иднината“, откри дека за него најтешко било што по успешно изведената операција, морал повторно да учи да оди и завршил со скршена рака. Имено, тој имал тумор на ’рбетот, а по зафатот и во периодот на закрепнување, паднал во кујната и се здобил со скршеница.

– Ми беше многу тешко тогаш. Бев потпрен на ѕидот во мојата кујна, чекајќи да дојде брзата помош, и се чувствував дека не можам пониско да паднам од ова. Сè за што размислував беше дека навистина нема ништо полошо од тоа. Ми се чинеше дека не правам ништо, дека само страдам, се мачам, се разболувам… Во тој момент се скршив – рече актерот и додаде дека се чувствувал како за него да не постои светлина на крајот од тунелот, бидејќи истовремено имал Паркинсонова болест, отстранет тумор, а потоа и скршена рака.

И покрај моментите во кои не се чувствувал најдобро и психички и физички, Фокс инсистира на тоа дека неговата благодарност сега е подлабока откако поминал низ тешките моменти.

– Мојот живот сега е мирен и, всушност, добро се забавувам – рекол Мајкл Џеј Фокс.
Тој додал дека луѓето не му веруваат кога вели дека го сака животот.

На актерот му беше дијагностицирана Паркинсонова болест во 1991 година, а јавно проговори за тоа во 1998 година. Наскоро ја основаше фондацијата „Мајкл Џеј Фокс за истражување на Паркинс“, собирајќи милиони долари за финансирање на истражувањето за оваа болест.

Во моментот најмногу време поминува со сопругата Трејси, како и со децата Сем, Акван, Скајлер и Езми.