Гласачите во четири американски сојузни држави – Алабама, Орегон, Тенеси и Вермонт – во вторникот референдумски се изјаснија за целосно укинување на ропството, но не и во Луизијана, каде што непосредно пред изборите предлагачот Едмонд Џонсон ја осуди сопствената иницијатива.

Џонсон објаснил дека во последен момент сфатил дека мерката што ја предложил може да предизвика контраефект. По неговиот повик, 60 отсто од гласачите во Луизијана го отфрлиле предлогот.

Ропството во САД е укинато со 13-от амандман во Уставот, но правна дупка во законот овозможува „приндно служење“, кое се однесува на правата на затворениците. Ако била прифатена мерката што ја предложил Џонсон, затворениците би добиле право да ги оспорат одлуките да бидат принудени да работат.

Експерти тврдат дека повеќе од 800.000 затвореници низ САД денес се принудени да работат, со мала или никаква парична надокнада. Во седум сојузни држави затворениците воопшто не добиваат пари за вложениот труд, а може да бидат казнети ако ја одбијат работата на која се принудени.

Џонсон, демократски државен пратеник од Батон Руж, вели дека со внимателна анализа на мерката што самиот ја потпишал утврдил дека би се оставил простор за проширување на модерното ропство.

Во актуелниот закон во Луизијана сега е наведено дека „ропството и принудното служење се забранети, освен во вториот случај, како казна за кривично дело“. Џонсон објаснува дека „ропството“ е забрането, но не и „принудното служење“, кое всушност го има „речиси истото значење“. Тој предложил да биде исфрлен делот „освен во вториот случај“, без да претпостави дека тоа може да се протолкува како изедначување на исклучокот, а не на забраната.

– Се изјаснив против сопствениот предлог за да не придонесам ненамерно за поголема штета. Законот денеска барем не е полош од тој што важеше пред два дена – изјавил Џордан во интервју за Би-би-си.

Како една од главните причини поради кои се поколебал, тој ја истакнал одлуката на Врховниот суд во јуни годинава да го поништи како „утврден закон“ правото на абортус.

– По поништувањето на случајот Ро против Вејд, не сакав да ризикувам со друг пример на поништување на нешто што го сметаме дека е добро утврдено – објаснува Џонсон.

Колебањето на Џордан е жестоко критикувано од активистот Кртис Дејвис, кој поминал 25 години во затвор во Луизијана пред да биде помилуван по повторно отворање на неговиот случај за убиство. Дејвис смета дека Џонсон се повлекол поради „политичко тргување“ со афроамериканските гласачи. Луизијана е една од ретките сојузни држави во кои како казна за кривични дела сѐ уште фигурира „принудна работа“, а трудот на затворениците денес има димензии на индустрија од која се заработуваат милијарди долари.

Дејвис тврди дека најважната цел е да биде променет 13-от амандман во Уставот на САД, кој има повисока правна моќ од уставите на сојузните држави. Таква иницијатива би била успешна ако добие поддршка од двотретинско мнозинство во Претставничкиот дом и во Сенатот.