Лога очекува Уставен да ја отфрли иницијативата на Левица за бришење на националноста од изводите
Министерот за правда Кренар Лога очекува Уставниот суд да ја отфрли иницијативата на Левица за бришење на графата за националност од изводите за родени, починати и венчани. Тој не се откажува од графата за националност во изводите и најави дека и натаму ќе издаваат изводи на родени, починати и венчани со графа националност.
Препорачано
-Законот предвидува тоа што е сатвено за новите изводи на родени, починати и венчани. Очекувам дека мериторно Уставниот суд ќе ја отфрли иницијативата на Левица и дека Законот за матична евиденција ќе биде во сила. Најавувам дека штом ќе имаме нова одлука на Уставниот суд ќе имаме и нови упатства и изводи што значи дека ќе се повтори праксата што ја воведовме со графа националност за да ја спречиме злоупотребата при вработување во целата држава – изјави Лога.
„Левица“, како што соопшти Уставниот суд, оспорува повеќе членови од постоечкиот Закон за матична евиденција, со кои е предвидено националност да се запише во матичната книга на родените, во матичната книга на венчаните и во матичната книга на умрените.
„Чувството на национална припадност е лично чувство на граѓанинот и не може да се докажува со јавна исправа, т.е. со документ издаден од државен орган, пред се поради фактот што слободата на изразување на националната припадност го вклучува и правото на промена на чувството за национална припадност, а со практичното воведување на графа за националноста во изводот од матичните книги – како јавни регистри, се окончува еднаш изразеното национално чувство, се наведува во иницијавата на „Левица“.
Од Уставниот суд информираат дека се оспорени три члена од Законот, односно зборот националност во изводите, каде покрај основните податоци за раѓање, живеалиште се додава и националноста на новороденчиња, на венчаните и на умрените.
Од Министерството за правда преку соопштение тврдат дека упатството со кое се воведе графа за етничката припадност во изводите од матична евиденција не е противзаконско.
За сомнежите што ги отвори Антикорупциската комисија за пробиени матични книги и трговија со лични податоци на граѓани при нивно пренесување во дигитална форма и дали може да се преземе заштита, Лога упати прашањето да се постави во Управата за водење матични книги.
-Треба да се обратите до директорот на Управата за водење матични книги, тој е одговорен за тоа прашање. Јас ниту имам такви информации, бидејќи тоа е посебен орган во состав на Министерството и најверојатно таму имаат некакви информации, рече Лога.
