Најголемите политички партии во Македонија, и на Македонците и на Албанците, се обединија во поддршката на законскиот предлог во личните карти во иднина да се внесува податок за етничката припадност, кој од граѓански ориентираната јавност и од некои помали партии се оценува како недемократски, анахрон и штетен чекор. Предлогот на БЕСА доби подршка од СДСМ, од ВМРО-ДПМНЕ, како и од ДУИ, Алијанса на Албанците и Алтернатива. Против предлогот засега се изјаснија само Демократски сојуз и Левица, а втората поднесе 1.200 амандмани со цел да го блокира неговото донесување во Собранието.

Засега не е јасно дали во предлог законот, кој, како што се дознава, бил дел од предизборниот политички „пазар“ на СДСМ со БЕСА, се предвидува задолжително изјаснување на граѓаните за етничката припадност, или е тоа „можност“ или опција, како што се изрази премиерот Заев Заев.

Одговарајќи на новинарско прашање викендов во Тетово, лидерот на СДСМ рече дека во него „не гледа ништо спорно“.

– Со законот што го прифативме уште при уставните промени ние даваме опција да се впише и етничка припадност, покрај националната, Македонци/граѓани на Република Северна Македонија. Личната карта се користи како патен документ овде во регионот на Западен Балкан, што е убаво, но може во случајов да е проблематично, но дефинитивно не е доволна причина за да не ја ставиме етничката определбата на граѓаните – изјави Заев.

Лидерот на ВМРО-ДПМНЕ Христијан Мицкоски, рече дека етничките графи се прифатливи за неговата партија, но да се наведе и „македонска“ националност, а не во графата за националност да стои „граѓанин на Република Северна Македонија“. Тој ја обвини Левица, дека „во соработка со СДСМ, го брани штетниот договор од Преспа“.

– Јас навистина не гледам зошто во мојата лична карта да не стои мојата национална, етничка определба дека сум Македонец, а некој тоа сака да го спречи. Зошто сака тоа да го спречи – прашува Мицкоски.

Аналитичарот Петар Арсовски за „Слободен печат“ вели дека личните карти се документ во кој може да се искаже етничката припадност.

– Согласно Договорот со Грција, единствено во националноста, односно етничката припадност, ќе може да се споменува „Македонец“, а за сè останато се користи терминот „државјанство на Република Северна Македонија“.  A личните карти се документ во кој може да се искаже етничката припадност. Заев и Мицкоски се обединија токму околу иваа идеја, некаде да може да ни пишува дека сме Македонци и во тоа не гледам проблем. Се надевам и во иднина ќе се согласуваат за повеќе ставови. Предлогот на БЕСА, пак, не произлегува од Преспанскиот договор, туку заради лични мотиви и можноста да исто така да пишува „Албанец“ на лична карта издадена во земјава – вели Арсовски.

Политичари, експерти и граѓански организации укажаа дека тоа е проблематично решение, ретко во светски рами, кое може да има бројни несакани последици.

Според Димитар Апасиев, лидерот на Левица, овој предлог е дел од Тиранската платформа, деградирање на државотворниот Македонски народ на ниво на „етничка заедница“ и „чекор плус кон идна федерализација и поделба на државата“.

За  професорката Мирјана Најчевска ова е „крајно несоодветно решение кое може да биде проблематично не само од аспект на дискриминација туку и нарушување на индивидуалните и граѓанските права“. Таа бара негово итно повлекување од процедура и нагласува дека политичките договори не мора да се имплементираат по секоја цена.

За професорката Билјана Ванковска, станува збор за „здружен злосторнички потфат во кој заедно ќе бидат убиени и изгледите за демократска држава и она малку што остана од Македонците.“ (Ж.Ј.-Л.А.)