Додека е во тек истрага и апсења на лекари, сестри, членови за комисии за злоупотреби со лажни документи за туѓа нега и инвалидски пензии, политичката партија Левица објави пресуда на која се гледа дека во 2013 година, Ташко Тошковски, за кој тврди дека му е татко на министерот за внатрешни работи, Панче Тошковски е условно осуден за измама на осум лица, односно дека зел мито за посредување за инвалидски пензии.

Според јавно објавената пресуда, Тошковски во првиот случај во август 2008 година му ветил на велешанец дека ќе добие инвалидска пензија без да оди на лекарски преглед, му зел 3.300 евра, но човекот останал без инвалидска пензија.

-На точно неутврден датум во текот на месец август 2008 година со намера за себе и за други да прибави противправна имотна корист го довел во заблуда оштетениот лажно прикажувајќи му го фактот дека за одреден паричен надомест наменет за членовите на инвалидската комисија може да му овозможи остварување на право на инвалидска пензија укажувајќи му дека по поднесување на барањето до Комисијата за утврдување на инвалидност во Скопје ќе добие покана на која не треба да се јавува на лекарски преглед а ќе добие решение за инвалидска пензија со што го навел да на штета на неговиот имот од поголема вредност му исплати 3.300 евра во денарска противвредност од 202.950,00 денари па откако истиот не се јавил во два наврати на закажаните лекарски прегледи во месец 12/2008 година не го остварил правото на инвалидска пензија – стои во пресудата.

Слични се и останатите седум случаи, за кои Тошковски бил осуден на условна казна.

-Утврдената казна затвор во траење од 8(осум) месеци нема да се изврши доколку обвинетиот во време од 2(две) години по правосилноста на пресудата не стори ново кривично дело – се вели во објавената пресуда.

Левица обвинува дека додека Тошковски се обидува да изгради слика дека го руши корумпираниот систен, фактите кои се обзнануваат укажуваат дека семејството на Тошковски било дел од тој систем.

-Имено, токму таткото на министерот на МВР во 2013 година бил осуден за измама на 8 лица заради примање мито при посредување за инвалидски пензии. Неговиот татко бил осуден на две години условна казна, затоа што од оштетените лица противправно наплатил речиси 25.000 евра, ветувајќи им дека ќе стекнат право на инвалидска пензија. Односно, таткото на Тошковски безобзирно манипулирал со поединци кои очигледно во незавидна положба, биле принудени да плаќаат огромни суми за да се изборат против аномалиите на системот. Бидејќи министерот Тошковски и за време на претходната влада на Груевски бил дел од институциите на системот (преку министерството на Миле Јанакиевски), очигледно тоа што бил дел од власта било доволно за неговиот татко да прави матни зделки со инвалидските пензии – пишува „Левица“.

Од Министерството за внатрешни работи не одговорија на прашањата на „Слободен печат“ дали е точно дека станува збор за таткото на Тошковски, но стигна реакција од ВМРО-ДПМНЕ во која индиректно се потврдува дека станува збор за таткото на Тошковски.

– Ја разбираме и нервозата и фрустрацијата на партијата Левица, приврзок на Зоран Заев и групата вљубеници во делото на Енвер Хоџа спрема министерот за внатрешни работи Панче Тошковски. Позади таа фрустрација се крие стравот и знаењето дека Тошковски расчистува со криминалците, и што законот после долги децении важи за сите подеднакво. Тошковски не сокри нешто, не рече дека законот не важи за неговиот татко, а за сите други важи, туку и роден брат или сестра да е, ако се огреши треба да одговара. Затоа и Левица и Димче Апасиев се преплашени. А еве дополнителна причина за нивен нов страв – се вели во реакцијата на ВМРО-ДПМНЕ.