Концесискиот надоместок за изградба на малата хидроцентрала на Мала река кај Градче сепак ѝ бил платен на Општина Кочани уште во 2018 година. Овој податок ни беше потврден од страна на финансиската служба на Општината, откако претходно од локалната самоуправа им се заканија со тужби на активистите за животна средина од Кочани, кои пред неколку дена ја објавија оваа информација, нарекувајќи ги лаги и пропаганда со умисла.

Од Општината за Слободен Печат потврдија дека концесионерот на малата хидроцентрала, ДИС Енергија уплатило еднократна сума на име на концесиски надоместок во износ од околу 344 илјади денари, но дека Општината нема склучено договор со концесионерот туку државата. Претходно, градоначалникот на Кочани Николајчо Илиев изјави за Слободен Печат дека нема информации дека ДИС Енергија уплатила пари на Општината.

Општина Кочани минатата недела ѝ се закани со тужба и побара јавно извинување од активистката на Грин Орг од Кочани,  Ана Симонова поради тоа што кажала дека постоел „склучен договор во 2018 година“, кога ниту таков документ постоел, ниту трансакцијата и дека со умисла влијаела на јавното мислење на граѓаните на Кочани. Грин Орг, како граѓанско еколошко здружение активно се залагаат за укинување на концесијата за малата хидроцентрала кај Градче со образложение дека таа ќе го загрози биодиверзитетот на Мала река и ќе ја уништи природата, а ќе ја загрози и акумулацијата Градче, инаку омилено туристичко место во тој дел на државата.

Сепак, во повеќе наврати Илиев, кој тврдеше дека е против изградбата на малата хидроцентрала, изјавуваше дека му биле врзани рацете со претходните постапки и издадени дозволи од страна на државните институции, па тој нема да можел да одолговлекува со издавање на градежна дозвола на инвеститорот на малата ХЕЦ на Мала Река.

Овој своевиден пресврт во поддршката која Општина Кочани им ја даваше на екоактивистите во борбата против малата хидроцентрала доаѓа неочекувано, веднаш по најавата на „зелените“ дека ќе бараат организирање локален референдум на кој граѓаните треба да се изјаснат дали се или не за изградба на мала хидроцентрала кај Градче. Исто така, во април годинава Советот на Општината се изјасни против одлуката за изградба на малата ХЕЦ, а за одлуката гласаа советниците и од владеачките партии и од опозицијата. Веднаш потоа, кочанското јавно обвинителство, ја отфрли пријавата од еколошките здруженија , откако претходно отвори истрага за случајот Мала Река за тоа дека граѓаните не биле консултирани при давањето дозвола за користење на водите на рекичката за производство на струја.

Според важечките закони, општините на чија територија била предвидена градба на мали хидроцентрали добивале дел од концесискиот надоместок кој концесионерите го уплаќале во буџетот на државата.  Токму поради потоа локалната самоуправа се чувствува обврзана да му ги издаде потребните дозволи на концесионерот кој ќе ја гради хидроцентралата.

Слично како и во Кочани, Општина Пробиштип пред неколку месеци му издаде дозвола за градба на истиот концесионер кој веќе гради мала хидроцентрала на Шталковичка река, со истото образложение- дека немаат друг избор. Грин Орг објави извод на кој се гледа уплата од 1,3 милиони денари на сметка на Пробиштип на име концесиски надоместок. Претставникот на ДИС Енергија за Слободен Печат потврди дека и за двете хидроцентрали уредно си ги подмириле обврските уште во 2018 година.