На двата гранични премина „Блато” и „Џепиште-Требиште” на македонско – албанската граница кај Дебар, минатата години регистриран е рекорден број минувања, при што доминираат албанските граѓани.

Според статистиката на македонското министерство за внатрешни работи за влез и излез се регистрирани вкупно 675.222 лица.

На граничниот премин „Блато” влегле 59.163 македонски државјани, а на излез се регистрирани 76.755. На истиот граничен премин бројот на странци што влегле е 280.409, додека за излез регистрирани се 234.094.

На граничниот премин „Џепиште-Требиште” за влез се регистрирани 1.455 македонски државјани, а на излез 1.500. Од друга страна, на овој премин, бројот на странски државјани е неколкупати поголем. Бројот на странски државјани за влез е 18.034, а на излез 18.111 лица, жители од областа Голо Брдо.

Овој граничен премин е од локален карактер, во летниот период работи од 6 до 20 часот, додека во зима од 8 до 18 часот и право да го користат имаат жителите од граничниот регион.

Македонските државјани во Албанија преку преминот „Блато” минуваат, главно поради користење на летните одмори на албанското крајбрежје, за посета или на домашни веселби кај на свои роднини и пријатели, како и набавка на зеленчук и јужно овошје. Преку вториот премин главно за посета на роднини, пријатели или по повод домашни веселби, поради роднинската поврзаност со жители од македонските села Отишани и Џепиште но и од Дебар.

Албанските државјани двата премина ги користат главно за шопинг во Дебар, каде набавуваат прехранбени артикли, облека, обувки, гориво, лекови, за добивање одредена здравствена услуга, како и за посета на туристички места. И тие поради роднинска поврзаност со дебрани доаѓаат во посета на роднини или на домашна веселби кај нив.