Нова кражба на кабли предизвика прекини во сообраќајот и доцнења, како и откажувања на поаѓања во двата правци на железничката линија Париз-Лион, објави денес француската национална железница SNCF.

Во соопштението се додава дека проблемите во железничкиот сообраќај на таа рута се очекува да траат до доцна вечерва, објави парискиот весник Фигаро.

„Причината за проблемот е кражбата на кабли, што предизвика дефект на сигнализацијата“, соопшти SNCF.

Додаде дека се очекуваат доцнења до два часа, како и откажувања на поаѓања на возови.

„Работите за поправка на сигнализацијата ќе траат неколку часа. За да се заобиколи зоната на инцидентот, некои возови ќе бидат пренасочени на алтернативна рута“, соопшти компанијата.

На станицата Гар де Лион во Париз беше објавено дека неколку возови ќе бидат доцнети помеѓу еден час и 2 часа и 20 минути попладнево поради овој „чин на вандализам“.

SNCF често се соочува со кражби на кабли што го нарушуваат редовниот железнички сообраќај, а во февруари сообраќајот беше привремено запрен во северна Франција поради оваа причина, додека на крајот на јуни истото се случи и на линијата помеѓу Лил и Арас, потсети Фигаро.