Британскиот атлетичар Мо Фарах потврди дека во септември со полумаратонот во близина на Њукасл ќе стави крај на кариерата.

Фарах за викендот во неделата го прослави својот 40-ти роденден и за последен пат го истрча Лондонскиот маратон на кој заврши на деветтата позиција.

„Дел од мене плаче, ќе ми недостасуваат сите тие чувства, многу сум емотивен. Tрката во сетпември во Њукасл ќе биде моја последна, тоа ќе биде мое збогување“, изјави Фарах за „Би-Би-Си“.

Атлетичарот кој е роден во Сомалија во кариерата освои десет златни медали на големите натпреварувања.

„Мојата кариера беше навистина неверојатна, моето семејство цело време беше покрај мене во ова патување и сега сакам да им се посветам на нив“, додаде Фарах.

На Лондонскиот маратон победи Кениецот, Келвин Киптум кој го оствари второто најбрзо време во историјата со два часа, една минута и 25 секунди.