Костадиновски: Не ми е познато дека некаде се тргува со хартиени обврзници
Финансиските експерти велат дека хартиите од вредност, во материјализирана форма, одамна се минато и дека тие веќе долги години тие се во форма на елктронски записи. Сепак, како што објасни директорот на Царинската управа Стефан Богоев, на 28 јули на скопскиот аеродром се запленети 184 обврзници со поединечна вредност од 500 илјади долари, или вкупно 92 милиони евра. Обврзниците биле ставени во четири папки.
Препорачано
Коста Костадиновски, овластен инвестициски советник во „Капитал асет менаџмет“ вели дека не би сакал да го коментира конкретниов случај но дека во пракса, корпорации, банки или држава, издаваат дематеријализирани хартии од вредност.
– На берза, или воопшто во модерното тргување ,не сум сретнал случај да се тргува со хартиени обврзници. Електронското тргување веќе одамна е наше секојдневие, а хартиени обврзници или други хартии од вредност, мислам дека имаат само колекционери – вели Костадиновски.
Тој објаснува дека и во времето кога постоеле материјализирани хартии од вредност, тие не се чувале по дома, туку кај депозитарот на хартии од вредност, каде што се впишувале и разни промени.
